For di bon fuente nos por a compronde cu ta tene reunionnan cu comisarionan di Utilities y RDA na cas di sr. Mike de Meza den Colony. Esaki ta e motibo dicon su menasa slap di bira independiente a caba. E mesun bon fuente aki ta bisa cu Mike de Meza a declara cu coalicion AVP-FUTURO a bay di acuerdo pa e por tin poder total den gobierno y den coalicion, basta cu Gobierno AVP-FUTURO por keda conta cu su sosten y di San Nicolas. Si esaki enberdad ta e caso, e ta un berguensa pa nos sistema politico di Trias Politica y alabes un confirmacion cu tanto sr. Rene Herde como Minister y e coalicion AVP-FUTURO a entrega nan mes na Mike de Meza como nan “Puppeteer” unda Mike de Meza ta dirigi e parlamentarionan di coalicion AVP/ FUTURO y ministernan di FUTURO na su kier.
Berguensa pa FUTURO pa acepta sr. Mike de Meza como nan “Puppeteer”
E ta un berguensa pa FUTURO cu tabata un partido cu a sali y priminti pueblo un politica nobo. Un politica unda entre otro lo bin solicitud habri pa funcionnan pa por traha cu Ministernan y esaki a resulta den un fiasco total. Nan tabata papia di ‘bon gobernacion’ y ‘democracia fuerte’, pero na final loke pueblo a haya ta un partido cu a demostra di ta un verlengstuk di AVP, unda cu mi lo cuminsa yama FUTURO mas dilanti como AVP 2.0. Un Partido cu ta aproba tur cos cu ta contra di regla, basta cu nan por keda na poder. A permiti pa hendenan cu antecedentenan penal tin posicionnan clave, unda ta ser bisa cu lo ta cobrando rond 15.000 florin pa luna, otro cu a ser hiba dilanti pa posibel practica di pornografia y asina por sigui menciona un cantidad di candidatonan y ex candidatonan cu titulonan traha cu ta cobra rond 15.000 florin sin a solicita y sin ta biba mes na Aruba ta djodjo cu placa di pueblo.
Pero awo AVP 2.0 lidera pa Geoffrey Wever, cu semper a papia di respeta democracia y nos constitucion, ta mustra un cara totalmente diferente. E y su partido a duna entrada na un Parlamentario cu no a pasa screening pa bira Minister y cu mes screening a pone bira sospechoso. A pesar di esaki, e ta tene reunion cu comisarionan di Utilities y RDA na su cas mes, y ta goberna for di su cas, usando Minister Rene ‘Baba’ Herde pa ehecuta su plannan. Y banda di esaki, tur hende sa cu sr. Mike de Meza ta e berdadero ‘puppeteer’ cu tin control total riba Ministernan y Parlamentarionan di FUTURO, mientras nan ta acepta esaki basta cu nan por keda sinta den nan stoelnan di Minister y Parlamentario.
Pa keda den Gobierno hunto cu AVP, FUTURO tin di Guli manda abao y laga Mike de Meza ta nan “Puppeteer”
E Ministernan actual di FUTURO (AVP 2.0) y Parlamentarionan di FUTURO (AVP 2.0) lidera pa Gino Goeloe den Parlamento tin di keda bati man y sacudi cabes bisando “SI” na tur cos di AVP pa nan por keda den Gobierno. Durante formacion AVP a laga e dos lidernan di FUTURO hunga tof, pero awo cos a bolter pa tin Gobierno y e dos lidernan di FUTURO sra. Gerlien Croes y sr. Geoffrey Wever tin di guli manda abao. Pueblo por wak cada bes ken ta dirigi y dicta den coalicion. Awo di leu pueblo sa tambe cu e dos lidernan di FUTURO y parlamentarionan di AVP y FUTURO ta biniendo door di nan holo sterki di nan perfume yama”Jetfuel”. Unda pa por sigui biaha pa cualkier evento cu bin, mester keda den Gobierno ‘cueste lo que cueste’ y asina por purba kibra e record di sr Mike Eman di biahe y potret.
FUTURO a bira nada mas cu e verlengstuk di AVP y unda Mike Eman y Mike de Meza ta actua como nan “Puppeteer” y sigur sr Mike de Meza a sa di haci bon uzo di su experencia pa maneha FUTURO na su antoho, paso e sa cu e dos lidernan di FUTURO ta sacrifica tur cos pa ta na poder. Pues hasta pa acepta p’un sospechoso como Parlamentario tin control total den Conseho di Minister y Parlamento.
E desilusion grandi
Pues tur locual FUTURO a priminti di politica nobo, a termina den un show: biahe sin fin di nan lider Gerlien Croes alo Mike Eman den pasado, sacamento potret tur caminda y sin cuero di cara ta gaba cu proyecto di otro of trabao di otronan. Pueblo ta wak cla awo: FUTURO cu tur su show y promesa nobo, a entrega nan mes na sr. Mike de Meza, e ‘puppeteer’ cu tin den su man minister Rene Herde, e Conseho di Minister y coalicion den Parlamento.
