Fundacion Chico Harms ta organisa dos parada pa celebracion di Dia di Brazil 2025 y e anja aki un biaha mas Grupo Alegria Di Nos Cultura, cu mas di 70 participante, ta cla pa briya y aporta na nos cultura.
E grupo lo participa den:
• Parada di Lanterna – Diabierna 5 di september 2025, 7:00 p.m.
• Parada Folklore-Cultural di Brazil – Diadomingo 7 di september 2025, 3:00 p.m.
E acompañamento musical lo ta den man di Robert Maduro y su Alma Folklorico, garantisando ambiente folklorico autentico.
Un legado di cultura y victoria
Na 2023, Grupo Alegria Di Nos Cultura a gana cu e cancion Laga Caya Papia! Anja pas ana 2024, e grupo a impreciona cu un presentacion den colornan blauw y blanco cu e tema Nos Piscadonan di Antes. Hende homber tabata bisti cu trahenan blanco y sjaal/sinta blauw, simbolisando nos lama, mientras e hende muhe tabata bisti cu shimis folklorico den colornan blanco y blauw di e bandera di Aruba. Un boto di piscado original den mes colornan a duna un toke special na e presentacion. E publico a keda encanta cu e boto aki.
Tema 2025: Nos Trahadonan di Antes den Mina di Oro
Bou manejo di Mirelda Vos cu asistencia di Marlyn Vos, e grupo ta presenta un tema nobo y impactante pa 2025: Nos Trahadonan di Antes den Mina di Oro.
Nos lo mustra un parti di e historia di Aruba. Kico tabata pasa den e tempo ey? Bo a bira curioso y bo ta puntra bo mes kico tur cos a pasa na e mina di Oro?
E ruina di Bushiribana ta conta un parti di e tempo ora tabata haña oro na Aruba y e historia di e mineria di oro na Aruba. Con nos lo bin bisti e anja aki?
• E hombernan lo bisti manera trahadonan den mina di oro na Aruba: carson preto, camisa blanco saca cu boton di oro, helman pa proteccion y un pik na man.
• E hende muhe lo bisti shimis folklorico bunita den colornan blanco, preto y saca cu oro, cu flor na cabey den mes colornan.
• E carosa principal lo ta representa e mina di oro di Bushiribana di antes unda e trahadonan tabata traha.
E inventador di e concepto y disenjador di e grupo y carosa ta na encargo di Richard Lopes Slot, cu ta busca pa trese bek na bida e diferente periodonan cu a forma e cultura di nos isla:
E biaha aki ta e historia di e trahadonan di antes den mina di oro.
Inspiracon y invitacion
Segun e organisadornan, e meta ta pa duna tur anja un otro dimencion na e parada, cu temanan realistico y cu ta ligan a e historia cultural di Aruba. “No wak dilanti so, pero wak bo pasado tambe pa bo por compronde bo dushi cultura di Aruba mas miho”.
Grupo Alegria Di Nos Cultura ta invita henter pueblo di Aruba pa participa y disfruta di e dos dianan cultural grandi akin a Brazil, cu yen di alegria, tradicion y orguyo Arubiano.
Informacion di contacto
Pa mas detaye of pa registra pa otro anja por tuma contacto libremente cu e Grupo Alegria di Nos Cultura.
