Ta bon pa pueblo realisa cu loke a keda logra diabierna ultimo durante e reunion entre e prome ministernan di e islanan y staatssecretaris Van Huffelen ta algo grandi. No solamente a preveni cu e condicionnan ta keda ancra den un ley di concenso (rijkswet) pero tambe COHO no ta bin mas. Esaki sigur ta salvaguardia  e autoridad y responsabilidad di Parlamento. Na mes momento door di a preveni concreticasion di COHO a para e rol adicional cu kier a encarga CAFT cu ne.

Desde un principio, caminda Hulanda a cuminsa condiciona e yudansa fianciero relaciona cu Covid, nos a cuestiona esaki. Desde comienso nos a vocifera di ta en contra di un ley di concenso. Nos semper a supraya e echo cu mester ta cla ken ta responsabel pa ehecucion di reformanan pasobra nos ta consciente cu esakinan ta necesario pero sigur ta haya necesario pa crea e balans necesario den nan ehecucion mirando e situacion di crisis ocaciona pa Covid. Primoridialmente nos a accentua e echo cu Gobierno di Aruba na tur momento ta na Parlamento di Aruba nan mester duna cuenta y responsabilisa nan mes. Cu un COHO esaki sigur no lo tabata e caso. Manera nos Minister President a indica corectamente un ley di concenso ta un tipo di ley cu ta deficiente pa loke ta trata democracia. E ta reduci e derechonan democratico di e pueblonan di Aruba, Corsou y Sint Maarten. Ta bon pa subraya cu e deficit democratico di leynan di concenso di Reino ta algo cu tur pais den reino ta reconoce, incluyendo Hulanda. 

Door di a preveni cu COHO a keda concretisa Parlamento ta mantene nan autoridad y derechonan como representantenan di pueblo, como co-legislador y tambe den nos funcion di controla gobierno. Esaki tambe ta conta pa gobierno cu ta mantene nan autoridad pa por fiha nan propio prioridadnan y ehecuta reformanan na un manera responsabel, sin por wordo obliga den cierto direccion. 

E logra grandi aki pa nos pais a bira posibel door di trabou duro, union y determinacion. Fraccion di MEP, claramente, den nos verslag encuanto COHO y Raft manda dia 20 di mei 2022 pa Tweede Kamer Hulanda a indica di ta contra di ambos Ley di Concenso y e proceso encamina pa a yega na nan. Mi ta convenci cu esaki sigur a hunga un rol crucial cu awe nos tin un “onderlinge regeling” na lugar di COHO. 

Sigur nos mester enfatisa y reconoce e trabou incansabel cu nos Minister President, sra. Evelyn Wever-Croes a bin ta haci, caminda el a entre otro percura pa Aruba keda na tur momento na mesa cu Hulanda. Alabes e la percura pa habri caminda pa e alternativa di un “onderlinge regeling” sin COHO y a percura alabes pa Aruba produci e prome concepto pa esaki. Despues e la traha cu Corsou y Sint Maarten pa yega na un concepto traha en conhunto y a entrega esaki na Hulanda. Awe COHO definitivamente ta for di mesa door cu Gobierno di Aruba a y ta traha constructivamente den relacionnan di reino y e proceso di ehecuta reformanan.

LEAVE A REPLY

Please enter your comment!
Please enter your name here