Despues cu United Nations Economic Commission for Latin America and the Caribbean (UN-ECLAC), riba peticion di Minister Geoffrey Wever, a completa un estudio amplio riba e potencial di FinTech na Aruba, ta continua awor cu e siguiente fase cual ta pa transforma e recomendacionnan tecnico den un plan concreto pa implementacion di sector FinTech na Aruba. Desaroyo di sector FinTech ta parti di Programa di Gobernacion AVP-FUTURO y ta un proyecto di Landspakket tema Economia.

Un proceso di destaho publico a wordo ehecuta pa selecciona experticio externo cu lo desaroya e Plan di Implementacion FinTech Aruba. Despues di evaluacion di e proposicionnan, Caribbean Identity Compliance & Consultancy (CICC) V.B.A. a termina na prome luga y cu e mihor relacion entre prijs y calidad. E evaluacion a considera, entre otro, calidad di plan di accion, calidad y experiencia di e team y prijs.

Minister Geoffrey Wever a indica cu e desaroyo aki ta representa un siguiente paso importante den un proceso cu a inicia cu un pregunta fundamental: con Aruba por usa tecnologia financiero como un instrumento pa diversifica economia, modernisa sector financiero y crea actividad economico nobo?

E investigacion di ECLAC a confirma cu, a pesar di algun reto y aspectonan cu ta rekeri atencion, Aruba tin condicionnan faborabel pa desaroya servicio FinTech y pa probecha di tecnologia manera Artificial Intelligence (AI) y Distributed Ledger Technology (DLT). E estudio a produci cuater documento fundamental, incluyendo un evaluacion di e ambiente regulatorio y institucional di Aruba, perspectiva di stakeholdernan y un roadmap strategico cu recomendacionnan concreto. E resultado y recomendacionnan di e estudio haci door di ECLAC ta ofrece un blueprint strategico pa mitiga retonan y juda e ecosistema di FinTech. 

E siguiente fase tin como meta pa traduci e recomendacionnan di ECLAC den un plan di implementacion cu por guia e pasonan necesario pa desaroyo di FinTech na Aruba.

Pa Minister di Finansa, Asunto Economico y Sector Primario, Geoffrey Wever, e siguiente fase ta parti di un vision mas amplio pa crea mas oportunidad economico pa Aruba y reduci vulnerabilidad cu ta resulta di dependencia fuerte riba un cantidad limita di sector.

“Un reto grandi den gobernacion ta transforma vision den resultado concreto. Na 2025 nos a inicia cu investigacion y analisis pa determina unda Aruba ta para y kico ta necesario pa desaroya FinTech di manera responsabel. Awor inicia cu e siguiente fase, cu ta transforma e recomendacionnan den un plan concreto pa implementacion,” Minister Wever a indica.

Segun Minister Wever, FinTech no mester wordo mira solamente como un asunto financiero of tecnologico.

“E meta no ta pa bin simplemente cu tecnologia. E meta ta crea condicionnan pa innovacion por genera actividad economico, inversion, conocemento y oportunidad di trabou. Si Aruba kier diversifica su economia, nos mester crea e base institucional y regulatorio cu ta permiti sectornan nobo desaroya di manera ordena, sigur y sostenibel.”

E plan di implementacion ta wordo prepara cu sosten financiero di Hulanda den cuadro di Landspakket Aruba.

E proceso pa selecciona e experto externo a conoce dos etapa. E destaho a wordo termina despues cu tur oferta financiero a resulta mas cu 20% riba e costonan estima inicialmente. Posteriormente a sigi cu un procedura di negocacion tocante e prijs y cinco inscribiente valido a haya oportunidad pa presenta un oferta revisa. Segun e evaluacion aki  CICC a logra e puntuacion mas halto, cu un oferta di USD 92.500.

Despues di a comunica e intencion di otorgacion na september na CICC, suheto na e periodo reglamentario di espera di 15 dia pa cu cualkier procedimento huridico cu eventualmente por wordo inicia conforme e reglanan di destaho publico, awor otorgamento definitivo a tuma luga. 

Minister Wever: “Diversificacion economico no ta pasa di un dia pa otro. E ta exigi vision, partnership strategico, investigacion, preparacion y despues implementacion. Mi kier a gradici Hulanda cu por medio di Landspakket ta financia e proyecto aki por medio di subsidio. Cu cada fase nos ta pone un siguiente piedra den e fundeshi pa crea un economia mas diversifica, innovador y resiliente pa Aruba.”