Un anochi di energia, alegria y pasion puro pa soca a crea un ambiente inolvidabel, caminda Aruba a corona su Rey di Soca 2025. Desde trempan anochi, e tarima tabata cla pa un competencia hopi preta. Awasero a cay na mes momento cu Tsunami tabata presentando, pero esaki no a stroba e fiesta grandi. E tabata mas bien un bendicion.
Cerca di 5’or di mainta, tabatin e gran anuncio: Malaghy Richardson, conoci como Freddy Rasta, a bira e Rey di Soca 2025. El a subi riba escenario hunto cu Massive Brassband y Tsunami, celebrando su victoria cu ‘1 for Unity’, un cancion cu a lanta animo di tanto e hurado como e publico.
Na di dos luga a keda Queen Shine, cu e temibel ‘Soca is life’, acompaña pa N’Fuzion. E publico caba tabata fascina cu esaki den e fase preliminar. Galloway, cu su ‘Dr. Carnival Lecture’, a drenta na di tres, respalda pa Tsunami.
T-Money, cu su energia y ritmo di ‘Soca Daddy’, a keda na di cuater luga, cu e apoyo di Groove Masters. Blacky, cu su temibel ‘Tell them’, tabata e di cinco finalista, tambe cu Groove Masters.
Freddy Rasta, yena di emocion, a comparti su gratitud riba Facebook, dunando un danki special na tur sponsor cu a deposita nan confiansa y a yuda su soño bira realidat. ForenSys Aruba, Champagne Carnival Group, Horacio Oduber Hospital, Tsunami Aruba, Big Mama Grill San Nicolas, Elite Empire Entertainment, HLNY y Astrid Raven tabata entre e apoyo mas grandi. E tambe a duna un danki special pa Jeon y Rygel Emanuel Isabella, cu nan formula secreto di exito.
Minister di Turismo demisionario, Dangui Oduber, tabatin e honor di corona e Rey di Soca 2025, mientras cu Anthony Irausquin di NV Elmar a entreg’e un certificado di un aña di coriente gratis como premio pa su logro.
Na final, Freddy Rasta a expresa su amor pa su familia, su team y tur persona cu a apoya ‘1 for Unity’. Con un brasa grandi pa Aruba, el a conclui: “RAMBADAM BADAM!”
Fotocredit: Facebook/ Freddy Rasta
