Aruba Tourism Authority (A.T.A.) a entrega dialuna, 11 di mei, su rapport anual pa 2025 na Minister di Turismo, Transporte y Labor, mr. Wendrick Cicilia, asina cumpliendo cu e reglanan vigente y cu e obligacionnan stipula den e Landsverordening instelling A.T.A. Sui Generis. Esaki ta marca otro paso importante den e trayectoria di A.T.A. como un entidad autonomo cu ta traha di manera consistente, responsabel y orienta riba futuro.
Desde cu A.T.A. a wordo estableci como entidad autonomo na 2011, e organisacion a cumpli cada aña cu entrega oportuno di su rapport annual, cu a pasa su proceso di audit financiero entre otro, permitiendo pa tin un bista cla y transparente di maneho financiero y di e direccion strategico cu A.T.A. ta sigui y locual a ehecuta den e cuadro aki na 2025.
Vision: Un Aruba Dushi pa Biba ta un Aruba Dushi pa Bishita
Un paso clave den 2025 tabata incorporacion di A.T.A. su di 4 plan di maneho MACS (“Multi-Annual Corporate Strategy”) cu ta consisti di 4 etapa di turismo responsabel te cu turismo regenerativo. Etapa 1 a inicia na 2025. A entrega un resumen di e strategia y prioridadnan den forma di un Position Paper di A.T.A. na luna di februari na formadornan y djey na diferente actor clave. E documento aki ta articula e vision a largo plaso y ta propone un modelo di gobernacion riba nivel gubernamental, encurashando un manera di trabou unda di manera inter-ministerial ta duna enfoke debido na e agenda di turismo.
E Rapport Anual ta incorpora tambe e Sustainability Ambition di A.T.A., cu tin como meta inspira, compromete y guia e organisacion den haci decisionnan cu ta pone preservacion di medio ambiente, cultura y calidad di bida di Aruba na promer lugar. Ta duna ehempel di pasonan tuma na 2025.
Ademas, A.T.A. a sigui fortaleca e calidad di nos destino, enfocando riba siguridad, espacionan publico y recreativo di Aruba. A traves di mehoracion coordina di “trails”, areanan rond di nos costa, servicionan publico y sitionan cultural, A.T.A. a contribui na un maneho sostenibel di e recursonan comparti di nos isla, apoyando un experiencia di bishita mas balansa y significativo, cu beneficionan tanto pa comunidad local como pa huespednan.
Acuerdonan strategico y colaboracion cu socionan local a keda clave
Durante 2025, A.T.A. a sigui implementa y apoya diferente iniciativa di turismo sostenibel, incluyendo colaboracion strategico cu partnernan manera Aruba Conservation Foundation (ACF), Aruba Hospitality & Security Foundation, Aruba Excellence Foundation, CEDE Aruba, Stimami Sterilisami, Go Cultura Foundation, Comite Olimpico Arubano (COA), Fundacion Chico Harms, Colegio EPI/SEPB y otro actor publico y priva. Tambe a aumenta enfoke local pa medio di campañanan di conscientisacion manera BanSerio cu asina a yuda fomenta comportacionnan positivo y un sentido di responsabilidad comparti entre residentenan.
Investigacion, dunamento di conseho, pero tambe advocacia a sigui forma parti central di e trabou di A.T.A., cu ta reafirma su compromiso cu un maneho di destino responsabel y un balans social, ambiental y economico pa beneficio di generacionnan presente y futuro, y na beneficio di nos comunidad y huespednan.
Cambio completo di strategia di comunicacion internacional
E Rapport Anual 2025 ta refleha un cambio consciente y delibera den e manera cu A.T.A. ta aborda mercadeo, promocion y comunicacion internacional, cu e evolucion continuo di su strategia aña pasa a lansa “When you Love Aruba, It Loves You Back”. E enfoke aki ta parti di e reconocemento cu turismo responsabel no ta un opcion, sino un imperativo global, y ta marca un transicion di turismo transaccional pa un modelo basa riba balor, calidad y impacto positivo. Aruba ta papia di esaki cu e huesped potencial, prome cu e dicidi di scoge pa Aruba.
Resultado di Turismo 2025
A.T.A. a observa cu e desempeño di turismo di Aruba den aña 2025 tabata uno fuerte. Mientras cu ta enfoca riba stabilisa e volumen di bishitante y trata di limita esaki y incrementa balor! Mester bisa cu e isla a ricibi 1,515,102 huespednan di stay-over aña pasa, cu ta representa un aumento di 7% compara cu 2024 y cu a pasa e proyeccion pa 2025. Entrada di turismo ta aproximadamente Afl. 5.6 biyon, un aumento di 8% compara cu aña anterior, cu un gasto promedio diario di huesped cu ta yega mas o menos Afl. 550 pa dia.
Ta gradici
Ta gradici e ekipo di A.T.A. na Aruba y den e diferente mercadonan internacional pa e esfuersonan inmenso desplega den 2025. Tambe ta gradici Hunta di Supervision di A.T.A. pa e diligencia y dedicacion den 2025 y como parti di e proceso di aprobacion di A.T.A. su Rapport Anual pa 2025. Ademas, ta gradici firma independiente Ernst & Young pa e trabou y colaboracion pa asina yega na un otro rapport anual cu entre otro un “goedkeurende verklaring” di nan parti.
Pa mas informacion y pa mira e resultadonan di e Rapport Anual, por bishita https://www.ata.aw.
