Den un ceremonia special y yen di orguyo, diesun (11) hondengeleider a ricibi nan certificacion oficial despues di a completa cu exito nan entrenamento K9 na BOT K9. E certificadonan, entrega pa Minister di Husticia, mr. drs. Arthur Dowers, kende a felicita e participantenan pa nan compromiso, disciplina y crecemento profesional den e cadena di siguridad di Aruba.
Di e diesun graduadonan, seis ta trahando na Korrektie Instituut Aruba (KIA) y cinco na Korps Policial Aruba (KPA). Tur participante tabata presente hunto cu nan K9 di servicio, cu kende nan a entrena intensivamente durante e trayecto y cu kende nan a pasa e examennan.
E entrenamento y evaluacion a enfoca riba diferente competencia specialisa cu ta esencial pa tareanan di siguridad y ley na Aruba. Diferente ekipo K9 a wordo certifica den area manera deteccion di placa, arma di candela, municion y droga ilegal. Ademas, a entrega certificacion pa competencia manera vigilancia, deteccion di holor humano y investigacion na escena di delito.
Durante e ceremonia, a pone enfasis special riba e colaboracion fuerte entre e hondengeleider y su cacho. Esnan presente por a aprecia e presentacion profesional di e ekiponan, unda a keda evidente e nivel di dedicacion, entrenamento y confiansa cu ta necesario pa funciona efectivamente como un ekipo K9.
Tambe trainer y asesor Dick van Laanen tabata presente durante e entrega, y el a expresa su aprecio pa e esfuerso di tur participante, felicitando nan pa nan rendimento impresionante y profesionalismo durante e trayecto di entrenamento.
E certificacion aki no solamente ta marca un paso importante den desaroyo di capacidad K9 na Aruba, pero tambe ta subraya e importancia di inversion continuo den siguridad, profesionalisacion y colaboracion entre diferente instancia.
BOT K9, Korps Policial Aruba y Korrektie Instituut Aruba ta mira bek cu orguyo riba un entrenamento exitoso, y ta desea tur hondengeleider y nan fiel compañeronan hopi exito den nan trabounan continuo pa garantisa siguridad na Aruba.
