ORANJESTAD – Recien a tuma luga entrega oficial di e Rapport Anual pa aña 2020 na Minister di Turismo Danguillaume Oduber. E entrega a wordo efectua den presencia di Presidente di Hunta di Supervision di A.T.A., Sr. Francisco Quant, conhuntamente cu CEO di Aruba Tourism Authority Ronella Croes, algun miembro di Management di A.T.A. y representantenan di oficina di e firma di accounting encarga cu e auditoria, den e caso aki Ernst & Young. 

Como e autoridad di turismo na Aruba, A.T.A. ta stricto den su maneho. Gerencia ta laga un diferente compania independiente haci auditoria riba base kwartaal tambe. For di 2011, na momento cu Oficina di Turismo a bira independiente, por bisa cu orguyo cu tur aña a sa di cumpli debidamente cu entrega di entre otro e Rapport Anual, cu ta inclui resumen di resultadonan y di trabou haci, como tambe e relato financiero cu su respectivo ‘goedkeurende verklaring.’

Conforme ley, tin dos momento clave pa Oficina di Turismo, e prome ta ora di haci entrega di e presupuesto pa e aña siguiente y e di dos momento ta ora di entrega e Rapport Anual cu e resultadonan di e aña anterior. E Rapport Anual ta consisti di un rapport general, financiero, y un parti unda ta elabora riba e trabao di e Hunta di Supervision. Den e parti general di e rapport ta inclui un compilacion di e logronan di e diferente departamentonan den A.T.A., cual ta e departamentonan di Mercadeo, Strategia Planificacion & Investigacion (‘Strategy Planning & Research’), Destination Services, Recurso Humano, y e departamento encarga cu e aspecto financiero, IT y maneho di facilidadnan di A.T.A. Ta inclui sigur e trabou inmenso cu oficinanan situa den diferente mercado ta efectua. 

Prome cu Minister aproba e rapport, esaki lo wordo manda pa parlamento di Aruba ‘ter inzage’ pa 10 dia di trabao. Despues di pone disponibel na parlamento, Minister di Turismo por duna su aprobacion formal pa cu e Rapport Anual di A.T.A., e edicion di 2020 pa ta exacto.

Esaki ta e di dies Rapport Anual di A.T.A. cu a wordo completa y cu ta carga un ‘goedkeurende verklaring’ di un compania di accounting independiente, esta Ernst & Young den e caso aki. Pa A.T.A. e ta un ehercicio extenso y di suma importancia y un parti integral di e maneho cu ta cana man den man cu ley stipula pa A.T.A. como tambe codigo di ‘Good Corporate Governance’ stipula pa A.T.A.

Mester añadi cu fuera di esaki, A.T.A. ta tene un auditoria financiero independiente per kwartaal, cual ta wordo conduci pa e oficina di accounting independiente, den e caso aki Grant Thornton. E auditoria ta inclui oficinanan internacional tambe. 

Resultado di aña 2020

Debi na e pandemia mundial di Covid-19, Aruba a haya su mes forsa pa cera su frontera na maart 2020 y a bolbe habri na juni 2020. Aki por mira hopi cambio den entrada. E asina yama ‘Tourism Credits’ tawata proyecta pa cera cu un crecemento di 2% pero 2020 a cera cu un caida di 49%, no obstante cu cada turista cu a bishita a gasta mas. Aruba a ricibi un total di 368.322 turistanan ‘stay-over’ durante 2020 ekivalente na un caida di 67% compara cu 2019, sigur bou di e proyeccion di un crecemento di 1.5%. Pa loke ta trata e industria di crucero, esaki a cera aña 2020 cu un total di 255.384 turistanan crucero, un caida di 69.3% versus meta stipula pa mantene locual a ricibi na 2019.

E pandemia a dal A.T.A. duro. Entrada a baha cu 62% na 2020 compara cu 2019. A.T.A. a ahusta su presupuesto drasticamente, incluyendo gasto di personal, y a continua 2020 cu fondonan significantemente reduci. Total na gasto tabata 49% menos cu 2019, cual ta inclui suma cu a ser usa for di e Fondo di Emergencia cu A.T.A. ta dispone di dje, cual pa ley ta destina netamente pa momentonan di urgencia asina ki. Pa 2020 A.T.A. su resultado final no ta uno positivo y como tal no tin pago lo tuma luga na Gobierno di Aruba (a base pues di e “net result”). 

Gradicimento

A.T.A. ta felicita e ekipo completo di A.T.A. pa e logro, esta di por a entrega un rapport cu un ‘goedkeurende verklaring’. Tambe ta gradici Hunta di Supervision, kende a duna prioridad un biaha mas na e rapport importante aki pa A.T.A. y pa bienestar di nos sector turistico. Ademas ta gradici Ernst & Young y mas cu claro ta gradici Minister di Turismo pa e diligencia necesario cu lo ser duna na revision y aprobacion di e documento aki.

E rapport anual di 2020 ta hopi diferente compara cu e ultimo añanan. A.T.A. ta haci su maximo esfuerso pa traha riba e pilar di nos economia, y recuperacion mas rapido cu ta posibel di esaki.

LEAVE A REPLY

Please enter your comment!
Please enter your name here