Diabierna merdia, abogado mr. Maduro di Adrian Faña a hiba defensa y a pidi pa aplica castigo hubenil.

   SOLO DI PUEBLO por a compronde cu e abogado ta haya cu Adrian Faña no solamente tabata victima di abuso sexual pero tambe tabata wordo traumatisa y esey a causa cu el a perde cabez.

ACUSADO TABATA WORDO MALTRATA

    Despues cu Fiscal a exigi 15 aña di prison pa Adrian Faña (A.F.), abogado mr. Maduro a bisa Hues cu esaki ta un caso lamentable y cu a causa daño na e famia. E abogado a mustra cu A.F. mes a admiti y Fiscal a exigi castigo pa a mata y no asesinato manera ta acusa A.F. di dje. E abogado a bisa Hues cu e pregunta cu mester haci ta, kico a causa cu A.F. a actua asina. E abogado a splica cu tempo cu A.F. tabatin 4 aña, su tata cu tabata un piscado a fayece. El a bay biba serca su wela y tempo cu e tabatin 12 aña el a bin Aruba y a wordo cria door di su tanta. E tanta a percura pa A.F. bay school y a cri’e. Na dado momento A.F. a stop di bay school. E tabata traha den oranan di mainta na un lugar. El a bay traha den construccion pero e tanta a prohibi’e pasobra e ta yega cas sushi. E abogado a mustra cu psycologo a constata cu A.F. ta menos educa. E no tabatin ningun hende mas cu su tanta. E tanta a bisa A.F. cu e no ta permiti A.F. trece hende cas. A.F. a bisa cu su mama biologico tabata maltrat’e y cu su padastro tabata maltrat’e cu cabel di coriente. Na school na Aruba e tabata wordo tenta.

WORDO OBLIGA PA TIN RELACION SEXUAL CU TANTA

  E abogado a sigui bisa cu A.F. a declara na Recherche cu su tanta tabata grit’e y ta dal’e cu wanta of un pida palo. E abogado a mustra cu tin declaracion di hendenan cu ta mustra cu regularmente tabatin discusion entre e tanta y A.F. A.F. a bisa cu e tabata wordo abusa sexual door di su tanta. Ora A.F. a bisa e tanta cu e no kier, e tanta a bis’e cu esaki ta su cas y cu A.F. mester haci loke e bisa sino A.F. mester bay for di e cas. A.F. mester a sigui tene relacion sexual obliga cu su tanta. Dia di e incidente mainta nan tabatin relacion sexual. Patologo a haya mustra di relacion sexual riba e tanta.

   A.F. a bisa cu den su cellular tin whatsapp caminda e tanta ta bis’e pa bay serca dje of keda lanta te ora e bin for di trabao. E abogado a mustra cu A.F. tabata den un situacion caminda un persona cu a adopt’e ta forc’e di tin relacion sexual cun’e. Abogado ta considera esaki actonan inmoral di e tanta pa cu A.F. E abogado a bisa cu tur esaki a causa trauma na A.F. El a pidi Hues pa tene cuenta riba e situacion psychico di A.F. E abogado ta haya cu tur esaki ta trece cune cu e castigo mester baha. El a mustra tambe cu psycologo y psychiater ta mustra problema mental serca A.F.

PROBLEMA MENTAL A EXPLOTA

E abogado a mustra cu psychiater ta haya cu e problema mental tabata afecta A.F. den su comportacion. Psycologo y psychiater ta haya cu A.F. ta menos responsabel pa su actonan. E abogado a pidi Hues pa tene cuenta cu e raportnan di psycologo y psychiater na cuenta. E abogado a mustra cu segun e expertonan, e problema mental a sigui crece y a explota den e accion cu A.F. a tuma contra su tanta. Psycologo y psychiater ta conseha tratamento largo pero no sera den un institucion.

    Mr. Maduro a pidi Hues pa no evalua e castigo riba loke a sosode sino tambe e situacion den cual A.F. tabata. E tabata victima di abuso sexual y problema mental.

IMPONE CASTIGO HUBENIL

Mr. Maduro a bisa Hues cu dia di e incidente A.F. tabatin 20 aña y investigacion ta mustra cu A.F. tin mentalidad di menos edad. El a wordo abusa tempo e tabatin 14 aña y tabata isola. E abogado a pidi Hues pa usa castigo hubenil contra A.F.

Pa loke ta demanda di daño, e abogado a mustra cu tin demanda no ta mustra kende a paga. El a mustra tambe cu gastonan di entiero, AZV ta paga un parti di esaki. E gastonan di e cas, e placanan di huur lo cubri e gastonan. E asunto cu ta pidi herencia di A.F., esaki ta un asunto civil y no por atende den un caso penal.

   E abogado ta conclui pa Hues wak e caso den su totalidad. E abogado a bisa Hues cu e no ta un asesinato sino culminacion di situacion cu a causa cu A.F. a perde cabez y a actua asina. E abogado a pidi pa aplica e castigo hubenil. En todo caso un castigo hopi mas abao di loke Fiscal a exigi.

ACUSADO A PIDI FAMIA DISCULPA

   Na final di tratamento di e caso, A.F. a bisa cu e ta compronde cu famia ta tume na malo. El a pidi disculpa na famia y a pidi e famia pa compronde su situacion. Hues a sera tratamento di e caso y dia 4 December 2026 tin sentencia.