ORANJESTAD – Den caso di Endy Croes contra Ernst & Young unda hues Jos Roovers a dicidi contra Endy Croes ta na nace e gran pregunta: riba kico e oordeel y sentencia aki ta basa realmente?
E huez a bisa cu den e bijlagen di e report di Ernst & Young (EY) no tabatin un claridad di tur gasto cu a wordo haci cu e creditcard di trabou. Roovers a conclui tambe cu no por wordo exclui cu e pago pa gasto priva tabata incompleto. “Het gerecht heeft in de bijlagen van het EY-rapport niet een duidelijk overzicht van de uitgaven met de zakelijke creditcard aangetroffen, maar kan niet uitsluiten dat de verrekening met privé-uitgaven onvolledig is.”
Pero aki ta unda e ta faya huridicamente:
No por acusa sin prueba. Den ley ta cla: ken cu ta acusa mester proba esaki. Ernst & Young nunca a presenta un lista of overzicht di gasto priva cu supuestamente Endy Croes no a paga bek. Ningun cantidad concreto no ta menciona. Den e vonnis no tin ningun cifra, ningun gasto, ningun fecha cu ta mustra cu algo no a wordo paga.
Sinembargo, Roovers ta conclui cu Croes no a proba cu tur cos tabata paga. Esaki ta un draaimento di “bewijslast”, ta bolter e peso di prueba, pasobra nunca no a wordo mustra cu tin algo cu keda sin wordo paga.
“Bewijs uit het ongerijmde”
Roovers a yama e pago di 19 oktober 2009 “bewijs uit het ongerijmde” , cu un pago no ta prueba cu semper tur pago ta wordo haci. Pero e punto principal ta falta: Unda e prueba ta cu tin algo cu no a wordo paga? Sin un lista di gasto priva no paga, esaki ta un razonamento bashi, sin base.
Sin base solido
Endy Croes a perde e caso di schadevergoeding contra Ernst & Young riba un base cu no ta hustifica den hecho. E ta enfatisa cu el’a paga tur gasto priva, sin keda ningun cent sin paga, y tur gasto via su creditcard tabata wordo desconta of paga via su salaris. El’a pone prueba.
E punto huridico esencial:
E vonnis di Roovers faya, pasobra no tin ningun prueba concreto di gasto priva no paga. E uitspraak ta basa riba suposicion y no riba hecho, y ta laga na banda e regla principal di ley: no por acusa sin prueba.
