Durante e mas reciente Accion di Bario na Companashi, ekipo intergubernamental un biaha mas a sali den comunidad pa scucha, identifica necesidadnan y trece solucionnan concreto. Segun Jaclyn Agunbero di Ministerio di Asuntonan General, e enfoke di e iniciativa ta: bay den bario cu diferente disciplina, scucha directamente di habitantenan y trece e problematica na departamentonan concerni pa nan haya oido y yudansa.
“Nos ta traha pa e bon comun. Ora nos bin den bario, nos ta brinda atencion, nos ta scucha, y nos ta trece e necesidadnan na instancia cu por duna solucion,” Jaclyn a splica.
Durante e accion, habitantenan di Companashi a ricibi invitacion pa probecha e oportunidad, pa saca desperdicio y otro tipo di material cu por elimina adecuadamente, contribuyendo asina na limpiesa y mehoracion di entorno.
Un aspecto importante di e accion di awe tabata e presencia di Luna Foundation, cu a participa pa atende necesidadnan relaciona cu bienestar di animal/mascota den e area. Representante di fundacion, señora Zoey Conijn, a indica cu hopi di e situacionnan cu nan ta enfrenta no necesariamente ta maltrato, pero tin hende cu simplemente mester un tiki orientacion of apoyo pa cuida nan mascota miho.
“No tur caso ta maltrato. Tin hende cu ta haci nan miho, pero mester un tiki ayudo — un casita, un cadena mas largo, of orientacion riba cuido,” Zoey a comparti.
Luna Foundation a ofrece registro di cacho, acesoramento riba cuido responsabel y informacion riba con comunidad por tuma contacto pa ayudo adicional. Comunidad por comunica cu Luna Foundation via Facebook of via telefono 563-6567 pa consulta riba operacion, cuido of asistencia cu cuminda.
E colaboracion entre Ministerio y Luna Foundation ta mustra cu Accion di Bario ta un enfoke integral: no solamente infrastructural y di limpiesa, pero tambe bienestar social y proteccion di animalnan.
Companashi a sirbi como un ehempel, cu bario mester atencion continuo, y cu traha hunto — gobierno, organisacion y comunidad — ta e caminda pa fortalece e Bon Comun riba Aruba.
