Na Aruba Conservation Foundation (ACF), cuida naturalesa ta cuminsa cu cuida pa e hendenan cu ta dedica na proteh’e. Siman di Aprecio di Asociado e aña aki a pone e bienestar di asociado central den su celebracion cu un programa di un siman diseña pa encurasha balans, conexion, crecemento y felicidad personal. E siman di celebracion tambe a coincidi cu dos dia di hopi importancia pa ACF cu ta Dia Mundial di Conservacion di Naturalesa (28 juli) y Dia Mundial di Ranger (juli 31) cu a haci e siman akinan uno mas special ainda.
Durante henter e siman, asociadonan a participa den diferente actividad cu a kita di nan rutina diario pa enfoca riba bienestar fisico y mental. Di un caminata den naturalesa y sesion di siña e poder di hala rosea cu un Yoga Instructor, pa cushinamento di cumindanan mas saludabel cu un nutricionista y tayer di comunicacion mas efectivo. Tambe asociadonan por a simplemente goza di momentonan cu a trece mas alegria prome cu cuminsa e dia di trabou door di saboria di un kopi di coffee di Cozy Cup Mobile Café y batido di fruta fresco di Fruktos Health. Cada actividad tawata diseña pa recorda asociadonan cu e mesun tempo cu nan ta hinka den proteha naturalesa nan mester hinka den cuida nan mes.
Pa duna forma na e programa, ACF a colabora cu YADE Wellness pa asina nan por a trece nan expertisio di incorpora habitonan saludabel den cada actividad. Pafo di siña maneranan pa ta mas saludabel, cada actividad tawata leuk y interactivo pa asina por a hari, forma union, y momentonan di aprecio pa un y otro. Esaki ta pone enfasis cu un lugar di trabou saludabel ta cuminsa cu conexion autentico y profesional.
E siman di celebracion a cera cu un caminata den naturalesa guía pa Nature Coach Gea Souge cuminsando na Sero Pela y pasando direccion pa Urirama y subi Sero Grandi na e area protegi di costa noord unda cu asociadonan por a trece un miembro di nan famia of amigo pa asina e experiencia di bienestar tambe extende pafo di solamente relacion di trabou.
“Nos asociadonan ta dedica nan mes na proteha Aruba su herencia natural y nos Siman di Aprecio di Asociado ta un oportunidad pa nos para keto y reconoce e contribuicion valioso cu cada un ta haci na conservacion di naturalesa y e progreso di ACF. Door di reconoce y duna aprecio, nos asociadonan ta sinti balora, y miho ekipa pa cuida otro, nos bishitantenan y nos naturalesa. Bienestar ta forma parti di crea un organisacion saludabel y resiliente cu ta haci cu nos ta haci nos trabou di conservacion di naturalesa mas miho”, ta comenta Tyson Lopez, Director General, ACF.
Pa mas informacion por tuma contacto cu Aruba Conservation Foundation na info@acf.aw of por bishita www.acf.aw of paginanan social Facebook of Instagram
