Dialuna mainta e homber J.V. (51) a presenta dilanti Hues, pa e caso penal cu Ministerio Publico a cuminsa contra dje. E ta wordo acusa di posecion di un pistool Glock y 48 bala.
SOLO DI PUEBLO por a compronde cu tanto Fiscal como Hues ta haya cu mester manda un señal den comunidad cu no ta tolera arma di candela. Hues a condena J.V. na castigo combina.
ARMA CU BALANAN
Fiscal ta acusa J.V. cu entre 1 Januari 2026 y 24 Juni 2026 e tabatin un pistool Glock y 48 bala. Ta asina cu dia 24 Juni 2026, Polis a bay haci investigacion na e cas di J.V. na Dakota. Den su camber a haya un arma di candela Glock y 48 bala. E arma tabata carga cu 12 bala y e resto di balanan a haya den e camber.
TATA A ACTUA PA MENAZA CONTRA YIU
Hues a puntra J.V. pakico e tabatin un arma di candela. J.V. a bisa cu su yiu homber a wordo menaza diferente biaha. A bay diferente biaha Recherche haci denuncia pero Recherche no a haci nada. J.V. a bisa Hues cu el a dicidi di manda e yiu Curacao. Despues cu e yiu a caba di studia, el a bolbe Aruba y atrobe menazanan a cuminsa. E ora ey el a dicidi di busca e arma.
Hues a puntra con e menazanan tabata. Segun J.V. nan tabata manda mensahenan y tambe potret cu tin un prijs riba cabez di su yiu. Hues a puntr’e kico tabata e problema cu e yiu tabata haya menaza. J.V. a bisa cu door cu e ta traha, e no ta na cas tur ora pa sa kico tabata pasando. El a bisa cu na comienso di 2026 el a dicidi di busca e arma y na dado momento e kier a deshaci di e arma pero Polis a haya e arma.
ARMA TA HOPI PELIGROSO
Hues a remarca cu no ta por nada cu arma di candela ta prohibi. Hues a bisa cu arma ta sumamente peligroso. Hende ta usa arma pa mata otro. Hues a puntra J.V. si e lo bolbe usa arma. J.V. a bisa cu no y cu e kier haya ayudo di Reclasering pa dun’e guia. El a bisa cu nunca mas cu e lo busca arma. Hues a puntr’e con ta para cu e menazanan. J.V. a bisa cu e menazanan a baha. Ta asina cu na cas di J.V. ta biba su mayornan y J.V. ta esun cu ta mantene su famia.
FISCAL
Fiscal a bisa cu e ta haya legalmente proba cu J.V. tabatin un arma den su poder. El a bisa cu J.V. a admiti di tabatin un pistool y 48 bala. Fiscal a remarca cu posecion di arma ta un problema serio na Aruba. El a mustra cu recien un mucha homber di 16 aña a wordo tira mata. Fiscal a bisa Hues cu mester manda señal bon cla na comunidad cu no ta tolera arma di candela na Aruba. Fiscal a remarca cu e arma tabata carga cu 12 bala.
Fiscal a bisa cu e ta sigui e maneho di Ministerio Publico y a exigi 9 luna di prison di cual 3 luna ta condicional cu un tempo di prueba di 3 aña. Fiscal a bisa cu e no ta mira kico Reclasering lo por bay siña J.V. pa no tin arma di candela. E no ta haya guia di Reclasering necesario.
DEFENSA ABOGADO
Abogado mr. Carlo a bisa Hues cu J.V. a admiti cu e tabatin arma. E abogado a pidi Hues pa tene cuenta cu e hecho cu 31 bala no ta Caliber di e arma cu J.V. tabatin. El a mustra Hues cu J.V. tabata miembro di un club di tiro y a keda cu algun bala. Abogado a mustra e carchi di miembro di club di tiro cu J.V. tabata te 201 y tambe documento di e balanan. E abogado a mustra cu e arma tabata warda den cas y no tabata riba caminda publico. Na opinion di mr. Carlo, segun e linea di maneho, esaki ta wordo considera un arma warda na cas. El a bisa cu ta promer biaha cu J.V. a cay den man di husticia. E abogado ta haya cu un castigo largo manera Fiscal a exigi, lo perhudica J.V. den keda cu su trabao y tambe cu J.V. lo no por paga hipoteca di e cas. E abogado a bisa cu J.V. a coopera cu investigacion di Polis. E abogado a pidi Hues pa castiga J.V. na castigo di prison igual na loke e ta sera, cu un castigo condicional largo y un tempo di prueba largo.
SENTENCIA
Hues a sera tratamento di e caso y a dicta sentencia di biaha. Hues a bisa cu ta un hecho cu J.V. tabatin un arma di candela carga cu balanan. Pa cu e castigo, Hues a bisa cu J.V. no tabatin intension criminal sino pa proteha su yiu. Hues a bisa cu J.V. pa proteha su yiu, a mand’e Curacao.
Hues ta kere cu mester pone un castigo pisa. Hues a bisa cu e ta comparti punto di bista di Fiscal cu mester manda señal bon cla cu no ta tolera posecion di arma di candela. Hues no a sigui e peticion di abogado mr. Carlo. Hues a condena J.V. na 9 luna di prison di cual 4 luna ta condicional cu 3 aña di prueba. Hues a bisa cu e no ta mira necesidad pa Reclasering guia J.V. El a ordena pa e arma y balanan wordo destrui.
