Desde 15 di maart 2026, negoshinan na Aruba ta bou di supervision di Aruba Fair Trade Authority (AFTA) pa loke ta trata cumplimento cu reglanan di proteccion di consumidor.
Negoshinan mester sa cua regla ta conta pa nan y aplica esakinan correctamente. AFTA ta controla si negoshinan ta viola derechonan di consumidor. Si tin un violacion cu ta afecta un grupo di consumidornan, AFTA por tuma medida contra e negoshi.
Pa yuda negoshinan cu esaki, AFTA ta organisa un sesion di informacion publico diaranson 25 di november 2026, di 16.00 pa 18.00 or, na Chapel di Universidad di Aruba. E sesion lo ta na Ingles.
Durante e sesion, AFTA lo splica su rol como autoridad supervisor. Tambe lo trata e seis areanan di supervision: propaganda engañoso, comunicacion comercial (digital), condicionnan general, compra di producto y garantia legal, contractnan na distancia y biahenan combina (pakketreis).
No warda: percura pa bo negoshi conoce e reglanan y aplica nan correctamente. Inscribi pa e sesion aki. E invitacion ta conta pa tur empresa na Aruba, incluiendo negoshinan cu no ta registra na Camara di Comercio of cu no ta afilia na un business association.
Despues di e sesion, lo tin oportunidad pa network y haci pregunta.
Inscripcion por bay via: [Link di inscripcion]
AFTA ta e autoridad independiente y imparcial di Aruba cu ta supervisa e bon funcionamento di mercadonan, den interes di empresanan y consumidornan. AFTA ta investiga mercadonan na Aruba y ta interveni ora tin violacion di reglanan. E autoridad por yuda preveni comportacion incorecto di negoshinan y, unda ta necesario, aplica sancion.
Pa mas informacion tocante AFTA, incluyendo un video cortico cu imagennan di un sesion di informacion anterior, bishita www.afta.aw.
