Den e debate riba e prome cambio di presupuesto 2026, Hendrik Tevreden ta puntra gobierno AVP-Futuro: ki dia e alivio ta yega cerca pueblo?
Mamanan soltero, tatanan soltero, famianan a bini e mesun mensahe: nos cartera no ta yega.
“Futuro a priminti cu nan ta bay drecha e situacion di pueblo. Awe nos tin e pueblo cu mas dolor den su cartera cu nunca,” Parlamentario Hendrik Tevreden (MEP) a bisa den Parlamento.
Ki dia e alivio ta yega?
Hasta colega Dennerich Kelly di AVP a bisa cla den sala: pueblo tin cu sinti e alivio. Tevreden ta completamente di acuerdo.
“Mi pregunta ta simpel: con pueblo ta bay sinti e alivio, y ki dia nan ta bay sinti’e? Un mama cu ta paga huur, coriente y awa, y cu na 15 di luna su cartera ta bashi caba, no ta biba di intencion di un gobierno. E mester accion!”
Placa pa adviseur, pueblo ta warda cas
Den e cambio di presupuesto, gobierno ta move Afl. 500.000 for di e ministerio di Huisvesting y Infrastructura pa paga adviseurnan riba energia.
“Mientras miles di famia ta warda un alivio, Afl. 500.000 ta sali di Huisvesting pa paga adviseur. Gobierno ta yama esaki ‘budgetneutraal’. Pa pueblo esaki no ta neutral. Nan ta keda sinti e efecto den nan cartera!”
Awa y coriente: bisa pueblo awe
Tevreden a pidi Minister di Finansa Geoffrey Wever un contesta cla riba awa y coriente pa 2027. “Minister a bisa cu awa y coriente no ta subi. Pues bisa pueblo awe: na januari, awa y coriente ta subi, si of no? Pueblo tin derecho di sa prome, no despues.”
Un coalicion cu ta papia cu dos stem
Tevreden a señala cu riba aumento di salario, coalicion mes no ta di acuerdo. Riba e mesun tema, un banda ta papia di “estudio” y e otro di “inmoral”. “Un ta papia di estudio, e otro ta papia di inmoral. Y comercio, trahado y famia ta keda den incertidumbre. Ta bay tin, si of no? Y ki dia? Nos kier e contesta di Minister Wever y di Minister-President Eman, awe.”
Seriedad, no plakprentje
Pa Tevreden, e peliger ta cla. “Mi ta warda cu ora eleccion yega, nos lo tende cu nan tabatin bon intencion, pero cu e otro partner no a laga. Pueblo no por paga su cuentanan cu intencion di un gobierno. P’esey awe, akinan den Parlamento, nos tin cu controla gobierno cu seriedad y exigi accion berdadero.”
“Nan ta gasta e placa prome, despues nan ta bin pidi permiso pa gast’e. Pueblo ta e ultimo cu ta haya sa. Awe nos ta exigi un cos so: bisa pueblo kico ta bay pasa, y ki dia.”
