Dialuna empleadonan di Alhambra Casino a wordo inscribi cu exito den e app innovativo di Payroll Pro HRM, marcando un paso importante den e compromiso di e compañia pa digitalisacion y mehoramento di nan maneho di Recurso Humano.
E Payroll Pro HRM App ta duna empleadonan acceso directo na servicionan esencial di HR for di nan telefonnan mobil. Pa medio di e app, empleadonan por pidi vakantie y ausencia facilmente, comunica cu HR, y tin acceso na documentonan importante manera nan carta di loonbelasting, y tambe nan payslips. Ademas, e app tin un ‘bulletin board’ unda e compañia por compartí informacion importante manera video’s, manual di empleado, y otro comunicacion interno, asegurando comunicacion cla y eficiente.
E evento di inscripcion a wordo organiza pa e HR Manager di Alhambra Casino, Sra. Jane Geerman, den colaboracion cu VCC International N.V., e distribuidor oficial di e software local Payroll Pro HRM. Durante e sesion, consultor di VCC, Sr. Theo Geerman, a duna instruccion con pa download e app, activa esaki y usa esaki di un forma efectivo.Empleadonan a mustra hopi entusiasmo pa e sistema nobo, resaltando e facilidad di tin nan informacion personal y laboral disponible directamente den palma di nan man.
“Pa nos ta importante pa nos bay sin papel,” segun Sra. Jane Geerman, Manager di HR na Alhambra Casino. “Nos kier cu tur solicitudnan—vacacion, ausencia, ora extra y mas—drenta via un solo canal, y esey ta via e app di Payroll Pro HRM. Esaki ta haci bida mas facil tanto pa departamento di HR como pa nos empleadonan. Tambe pa managernan e ta mas facil y eficiente pa maneha nan departamentonan, pasobra nan por aproba of rechaza solicitudnan di nan miembro di team directamente pa medio di e app.”
E implementacion exitoso aki ta mustra e dedicacion di Alhambra Casino pa mehora e experiencia di su empleadonan door di uzo di tecnologia, mientras cu e ta optimisa procesonan interno.
