Loke a sali na cla den parlamento ayera ta cu e mes masterplan cu MEP a laga atras ta sigui: gobierno no tin ningun plan nobo, completamente contrario na loke e parlamentarionan di fraccion di AVP a insinua den prensa tocante AWSS. E plan anterior cu ta riba mesa tin e respuesta pa e crisis rond di AWSS. Mientrastanto tin un problema nobo cu a surgi rond di Parkietenbos, e awa cu tawata wordo bendi, no por wordo bendi mas pasobra e calidad no ta adecua, y tin un holor creciente den e vecindario. E rioleeringstelsel ta den un mal condicion y a busca robotsnan nobo pa atende cu e problema aki.
E problema central: tin un plan traha caba a base di experticio internacional, entre otro door di Haskoning y esey nunca a wordo implementa na serio pa e ekipo nobo, pasobra cu a crea un problema politico cu un situacion cu ta un crisis pa Aruba.
E ironia ta grandi. Fraccion ta bagatalisa e proyecto den prensa, pa djey gobierno sigui e mesun plan proponi desde inicio. Asina ki nos ta perde tempo valioso pa yega na un solucion pa pais. Pa e proyecto aki, a presenta un roadmap na organisacionnan manera KVK, AHATA y ATA. Tur a haya e presentacion di Haskoning. E documento a wordo reparti y haci publico y e direccion tabata defini. Tur hende ta di acuerdo cu ta esey tin di tuma lugar. Pero a dicidi pa pone un paro.
Parkietenbos na riesgo di bira “Bubali Plas nobo”
Mientras tanto, e preocupacion a bira mas grandi den comunidad: holor na Parkietenbos ta crece. Loke antes tabata incidentalmente, ta birando structural. Habitantenan ta intrankil, y nan tin rason. Nos kier laga Parkietenbos bira un segundo Bubali Plas cu holor insoportable?
Mi a haci preguntanan cu gobierno no ta contestando:
- Ta bai re-route e tubonan pa Parkietenbos?
- Pakico e holor ta aumenta?
- Unda ta e solucion riba corto plaso?
Esakinan no ta detayenan tecnico pero ta precupacionnan pa nos salubridad publico y calidad di bida di nos hendenan.
Decisionnan bieu bon tuma, ta bira caos nobo
E situacion a bira mas confuso ora nos wak decisionnan anterior cu tawata bon tuma, y segun e plan cu tur stakeholders a aproba y sostene, diripiente ta wordo cambia. Esaki a trece un caos di rond di 10 miyon euro na machinnan cu a wordo saca for di servicio sin cu tin un rapport pa indica dicon ta haci esaki. E machinnan aki tawata pa pusha mas oxigeno den e awa pa yuda mehora e proceso y calidad di e awa. E chaos ta, ken ta para responsabel pa e 10 miyon euro aki awor? Unda e rapportnan pa sostene e decisionnan pa kitanan ta? Kico ta e base pa tuma e decisionnan ey?
Conclusion
Den e reunion aki nos no a haya e contestanan. Nos lo sigui presiona te ora cu nos haya nan si. Pasobra ta parce awor cu e problema a duplica. Holor na Bubali Plas y awor holor tambe den Parkietenbos. Pa remata, ningun hende responsabel pa e decisionnan tuma.
Gobierno ta trata di mustra cu tur cos ta bou di control. Pero realidad ta otro. Y esaki ta precupante. Mi a pidi minister Dowers pa e pasa door di e rapportnan pa asina e domina e materia aki mihor, pa evita cu mañan nos ta perde tempo, machine y djey tin di ehecuta e mes plan, pero awor na un prijs mucho mas caro mirando con tempo ta cambiando.
Aruba no por permiti improvisacion riba e nivel aki.
