ORANJESTAD – E tension den e oficinanan di mas halto di ENNIA Aruba a rementa. Loke tabata wordo papia den gang awor ta riba mesa di hues: un enquette legal na corte! Un demanda legal pa investiga iregularidad, benta secreto, y pasonan ‘straño’ entre e compania y Banco Central.
E situacion rond di ENNIA Aruba a drenta den un fase critico. Un parti di e hunta di comisario y e directiva mes a start un procedura legal di investigacion na corte pa saca tur loke ta scondi na luz di dia. E meta? Investiga con e maneho a wordo hiba y con decisionnan crucial a wordo tuma tras di porta cera.
Benta di ENNIA bao di man?
Den curason di e conflicto tin e benta planea pa un grupo bou guia di Aruba Investment Bank (AIB), unda Guardian Group lo tin un rol grandi. Den e mundo financiero, e zonido di alarma ta batiendo duro. Tin un miedo grandi cu Guardian por haya un control casi absoluto, locual lo ta un golpi mortal pa competencia liber na Aruba. Si un solo grupo lo bira dimas poderoso, e consumidor Arubiano ta esun cu lo paga e prijs cu primanan mas halto.
Appnan di WhatsApp y E-mailnan ‘Pikante’
Pero e parti mas sensitivo ta e relacion entre e CEO di ENNIA y e topnan di Banco Central di Aruba (CBA). Informantenan ta papia di un comunicacion “demasiado confidencial” via WhatsApp y e-mail cu ta bay hopi mas leu cu un relacion profesional entre supervisor y esun supervisa.
E investigacion lo mester determina si Banco Central tabata simplemente vigilando, of si nan tabata “pusha” e benta den un direccion specifico. Independencia di nos Banco Central ta e pilar di nos economia, y cualkier duda riba esaki por causa un temblor den e confianza di inversionistanan.
Diferencia entre banconan central di Aruba y Curacao
Pa colmo, tin un diferencia entre e supervision di Aruba y esun di Corsou/St. Maarten (CBCS). Mientras CBCS kier a mantene ENNIA Aruba den e structura di e Holding pa mas tempo, e partidonan local tabata purba acelera e benta. E falta di coordinacion aki ta pone pregunta serio riba con safe nos placa ta.
Confianza den peliger
Loke pa hopi aña tabata un relacion positivo, a bira un campo di bataya desde cu e grupo di AIB y Guardian a drenta den e wega. Tin un percepcion fuerte di trato preferencial.
Si e investigacion haya prueba di comunicacion inapropia of conflicto di interes, cabesnan lo tin cu cay. E lunanan cu ta bini lo ta decisivo: e futuro di ENNIA ta na peliger, pero mas importante ainda, e credibilidad di e supervision financiero di Aruba ta den wega.
Un enquette ta un investigacion legal formal pa mira si ENNIA Aruba a wordu maneha corectamente i si tabatin influencia inapropia of conflicto di interes den e proceso di benta i supervicion.
Solo di Pueblo a sigui e informe aki for di Matutino Extra na Curacao, cu tin fuentenan directo, cu conoce e datonan.
Nota: manera t’e mal custumber na Aruba, ora nos redaccion pidi reaccion di e instancianan menciona, (hoord/wederhoor) nunca nan tey of kier contesta, pero nos ta keda disponibel si, si nan kier papia.
