Quota International of Aruba a organisa su evento anual di donacion, unda cu a entrega fondo na diferente fundacionnan local cu ta haci un trabou extraordinario pa mehora bida di personanan den nos comunidad.
E momento special aki ta refleha e compromiso di Quota pa sirbi Aruba. Danki na e diferente actividadnan y evento di recaudacion di fondo cu Quota ta organisa durante aña, ta bira posibel pa sostene iniciativanan cu ta impacta positivamente bida di personanan den nos comunidad, especialmente esnan cu tin mas necesidad di apoyo.
E donacionnan a bay na organisacionnan cu ta traha den diferente area, manera di cuido pa mucha y famia, educacion, salud, conscientisacion social y sosten pa hende vulnerabel. Tambe fundacion cu ta dedica nan mes na sostene personanan cu dificultad di oido a ricibi apoyo, reforzando e compromiso di inclusividad den nos comunidad. Cada un di e fundacionnan aki ta haci un diferencia real, y Quota ta honra di por contribui na nan mision.
Quota International of Aruba ta keda comprometi na sigui traha pa nos comunidad, promoviendo solidaridad, compasion y accion positivo pa un futuro miho pa tur hende na Aruba.
Pa mas informacion, sigui Quota International of Aruba riba nan pagina di Facebook.
