Diadomingo mainta, weganan di campeonato di futbol, La Liga Santander di Spaña a continua caminda FC Barcelona a enfrenta Levante.

FC Barcelona den ultimo weganan no ta demostrando e wega cu ta acostumbra di dje, hopi critica ta bay pa entrenador hulandes Ronald Koeman.

E wega aki a inicia y apenas na di 6 minuut, Memphis Depay ta haya infraccion den area penal caminda referee ta fluit tiro penal pa Barcelona.

Memphis Depay mes ta tuma e tiro aki y ta anota prome gol di wega pa asina haci e wega 1-0 pa Barcelona.

Barcelona a sigui hunga bon futbol y combina bon cu otro den e wega aki y tabata na di 14 minuut, Sergino Dest ta duna Luuk de Jong un tremendo pase caminda De Jong ta avanza y ta anota di dos gol di wega pa haci esaki 2-0 pa FC Barcelona.

Asina tambe prome mitar a bay den descanso cu score di 2-0.

Den di dos mitar, Levante a busca manera di drenta den e wega aki, pero defensa di FC Barcelona tabata hopi atento den e wega aki.

Mientras cu minuutnan tabata pasa por a tuma nota di e hungador Ansu Fati kende casi un aña no a mira accion debi na un lesion grave cu e la sufri na su rudia caminda dos operacion delicado a tuma lugar pa asina scapa su carrera como futbolista.

Faltando mas o menos 10 minuut pa wega termina, publico a lanta y aplaudi e regreso di Ansu Fati bek riba tereno cu su ekipo di FC Barcelona y e biaha aki bistiendo number 10 cu tabata pertenece na Lionel Messi.

Mesora e velocidad di Ansu Fati a keda mira y tabata den minuutnan extra di wega, Ansu Fati ta avanza dilanti di gol di Levante y ta los un tiro fuerte cu a resulta den e di tres gol pa FC Barcelona y e prome gol di Ansu Fati den campeonato aki.

Asina tambe e wega aki a termina cu score di 3-0 na fabor di FC Barcelona cu ta logra victoria despues di dos empate sigui den campeonato di La Liga Santander di Spaña.

LEAVE A REPLY

Please enter your comment!
Please enter your name here