Diasabra den oranan di atardi (ora local) a tuma lugar programa di boxeo na stadion di Tottenham Hotspur caminda cu e pelea principal tabata entre Oleksandr Usyk di Ukrania y Anthony Joshua di Inglaterra.

Anthony Josha tabata campeon y tabata doño di 4 titulo mundial (faha) cual tabata WBA, IBF, WBO y IBO mientras cu Oleksandr Usyk tabata campeon di peso cruiser y a subi pa enfrenta Joshua kende tabata tin un pelea grandi firma cu Tyson Fury, pero pa motibo di clausula di revancha entre Tyson Fury y Deontay Wilder e pelea aki no por a continua y a dicidi di acepta e pelea contra Oleksandr Usyk.

Expertonan di boxeo tabata bisa cu e pelea aki lo mester tabata facil pa Joshua gana convincentemente y cu esaki lo ta un pelea pa tune up wardando ganador di e pelea entre Fury y Wilder.

Pero Usyk tabata tin otro plan, for di bastante luna caba e tabata train, prepara su condicion fisico pa tipo di peleanan aki, caminda e la declara cu e tabata sinti cu e lo subi di peso cruiser pa bira peso heavy.

Anthony Joshua a subi ring cu un record di 24 pelea gana, 22 gana pa knockout y pelea perdi mientras cu Oleksandr Usyk a subi cu record di 18 pelea gana 0 pelea perdi y 13 pelea tabata gana pa knockout.

For di comienzo di pelea por a mira cu Usyk tabata move hopi mas ariba ring, confundiendo Joshua masha hopi mes, e no a para ningun momento keto dilanti Joshua y tabata usa movimento di cabez constantemente, y atacando usando hopi su jab y tambe despues finalizando cu golpinan fuerte tanto na curpa y cara di Joshua.

Anthony Joshua a busca tur manera pa reacciona riba e estilo aki, comentaristanan hasta a bisa cu kizas e tabata spera Usyk cansa pa asina remata e pelea, pero esey no a sosode, Usyk a keda bringa un pelea inteligente y na varios ocasion a pone Anthony Josha den hopi problema, tabata parce cu na cierto momento e pelea aki por a caba pa medio di knockout, pero Joshua a keda riba pia henter e pelea.

Den di 12 round, Oleksandr Usyk a busca e pelea pa caba pa knockout y por poco a logra esaki, pero Anthony Joshua a keda riba pia y a soporta e golpinan di Usyk, pero despues di 12 round Anthony Joshua a mustra hopi den mal condicion, sinta den su skina y doctornan di pelea tabata mustra cara di preocupacion pa cu e boxdo aki.

Na final di pelea, tur tres juez a mira un solo ganador y a resulta di ta Oleksandr Usyk cu a bira campeon mundial nobo di peso pisa den boxeo.

Oleksandr Usyk ta logra algo cu Evander Holifield a logra basta aña atras ora cu e la laga peso di cruiser y subi pa peso pisa.

Desues di pelea a puntra Usyk si e ta dispuesto pa duna Joshua un revancha, e la bisa cu si, pero e ta desea pa e pelea aki tuma lugar na su pais natal Ukrania.

LEAVE A REPLY

Please enter your comment!
Please enter your name here