Diadomingo marduga den careda di 1:20 polis ta yega cu urgencia ex Sand Beach, unda cu di un supuesto pelea a termina na un tiramento.
Polisnan cu a yega a pidi ambulance cu urgencia, debi cu na e sitio caba e victima ya no tawata halando rosea. Ambulance cu a yega hopi lihe a transporta e homber cu urgencia pa Hospitaal, unda cu ya pa 1:36 dokternan ta constata su morto.
Aki ta sigui relato oficial di parti sr. Laclé cu ta e vocero di polis:
“Diadomingo pa mas o menos 1:25am Central di Polis ta haya informacion cu tabata tin pelea cu a termina cu tiramento na altura di ex-Sand Bar situa na Palm Beach, Noord. Central di Polis ta dirigi patruya cu maximo emergencia na e sitio.
Na e yegada di e patruya nan ta haya un situacion caotico y mester a pidi esfuerso di mas patruyanan policial. Patruyanan di Oranjestad, Santa Cruz, Noord, San Nicolas y RRT a bin duna nan colega un man.
Ambulance tambe a yega na e sitio y a hiba un persona cu maximo urgencia hospital.
——Na yegada na hospital dokternan no por a haci muchu mas. Pa 1:36am dokter ta constata morto di e victima Anthony A. Carty naci na Aruba y tabata tin 31 aña di edad.
Full e area a keda cera pa asina e recherche y polis forensico por haci nan investigacion na e sitio di incidente.
Un rato despues unidad di RRT a detene un persona na un appartement na Saliña y a confisca un Toyota modelo Vitz pendiente di mas investigacion.
E caso ta bao investigacion pa departamento di recherche di Noord.
Cuerpo Policial Aruba ta manda palabra di condelencia na e famia di fayecido.
