Diadomingo mainta algo despues di 11’or, alarma a wordo bati na warda di polis na Shaba, ora cu a descubri Antoni Gario den cel den posicion cu el’a pone fin na su bida.
Cu maximo urgencia a pidi ambulance pa duna asistencia. Na yegada ambulance a traha cune, pero sin exito.
Gario a pone fin na su bida, riba dia di tata.
Gario a wordo deteni dos dia pasa, riba denuncia di su propio yiu muher, pa actonan di abuso sexual, na momento cu su yiu no tabatin 16 aña ainda.
Ministerio Publico a bisa cu e investigacion ta di 2019 y no tabata facil, pero awor ta asina leuw cu nan por detene Gario pa haci’ele responsabel.
Gario a dicidi cu e lo no kier confronta husticia. Den su mes palabranan usa den pasado, cu esey ta “shame for fame”.
Gario ta bini di un hubentud, unda el’a wordo bandona pa su mayornan y na dado momento a crece serca otro famianan. Tabata biba den Imeldahof y asina e tabata por a acudi cerca varios famianan na Aruba. Un hubentud di lucha, pero alaves a surpasa tur reto y tabata manera un lider pa su amigonan di infancia.
Aparte di su problema cu husticia, Gario ta un musico grandi di nos pais.
E ta un di e poco musiconan cu pa 30 aña largo por a wanta un musical band, y cu asina hopi fanatico, y fanatico hoben.
E morto di Gario sigur lo ta un impacto riba su famia, conocirnan, su banda Le Groove y demas fanaticonan y hasta esnan cu no conoce, pero toch gusta su ambiente musical.
Solo di Pueblo ta extende condolencia na famia, amigo, banda y fanaticonan.
