Den e caso penal ‘New York’, e ultimo caso contra e sospechoso N.M.Q.C.d.A. a ser trata den Corte Comun (Hof) dia 26 oktober 2026.
Den e caso penal aki un total di cinco persona a wordo condena pa malversacion, violacion di secreto profesional, abuso di funcion y soborno. Cuatro di nan a dicidi pa accepta nan condena. Ministerio Publico tambe a dicidi pa retira su apelacion den e cuatro casonan aki, loke ta nifica cu e sentencia di hues den Prome Instancia a bira irevocabel.
Den e caso contra e sospechoso N.M.Q.C.d.A., e sospechoso acepta e declaracion di prueba di e hues den prome instancia. Pesey, e apelacion di e sospechoso den Corte Comun ta wordo limita solamente na e castigo.
Como cu e ultimo caso aki ta trata solamente e parti di e castigo, esaki a habri espacio pa otro casonan penal wordo trata mas trempan. Ministerio Publico ta desea di haci uzo responsabel di e capacidad limita pa trata caso na Corte Comun. Pesey Ministerio Publico ta bai tambe cu e prueba di hues y ta acepta e absolucion (vrijspraak) pa e acusacion di participacion den un organisacion criminal.
SECRETO PROFESIONAL
E caso penal New York ta trata di corupcion den funcion publico y violacion di secreto profesional door di un agente policial y varios periodista den e periodo di januari 2021-maart 2023.
Corte den Prome Instancia a condena e agente policial na december 2023 pa malversacion, violacion di secreto profesional, abuso di funcion y soborno pa un castigo di prison di 16 luna, di cual 8 ta condicional, y un prohibicion pa eherce su funcion pa un periodo di 3 aña.
E otro personanan a wordo condena na castigonan di prison y castigo di trabou communitario na december 2024 pa corupcion y complicidad den violacion di secreto profesional.
E sospechoso N.M.Q.C.d.A a haya un castigo di prison di 18 luna, di cual 12 ta condicional, y un tempo di prueba di 3 aña.
LIBERTAD DI PRENSA
Libertad di prensa ta un derecho fundamental cu mester wordo respeta y proteha, pero e tin limitenan hopi duidelijk. E no por sirbi nunca como un licencia pa haci cosnan contra ley. Solamente den casonan excepcional, ora ta imposibel pa expone un maldad grandi sin kibra ley, lo por hustifica un apelacion riba e derecho aki. Den e caso New York, hues a wak specificamente si por papia di algo asina, y a huzga cu no tin ningun indicacion di esaki.
Ministerio Publico ta di acuerdo cu e punto aki y ta bolbe pidi un castigo di prizon. E sospechoso C.d.A a wordo condena caba den pasado pa hechonan similar na un castigo maximo di trabou communitario y un castigo di prizon condicional. E hechonan cu e sospechoso ta wordo acusa di dje den e caso New York a pasa dentro di e periodo di prueba di e castigo condicional y pa e motibo aki Ministerio Publico a pidi Corte Comun pa impone un castigo mas halto di prizon incondicional.
Corte Comun di Husticia lo dicta sentencia riba 17 november 2026.
