Cu gran satisficacion mi kier felicita sr. Hendrik Federico Leo, miho conoci como Henny Leo kende diamars a cumpli e bunita edad di 87 anja. Pabien na su persona y tambe familiarnan, amistadnan, amigo y conocirnan. Como ex-miembro di SAMS pero principalmente como bon amigo di sr. Henny Leo y naturalmente cu su permiso lo mi kier trece den e matutino aki un historia cortico di sr. Leo encuanto e deporte di pustamento di auto na Aruba cal a cuminsa den siglo pasa.
Segun mi a wordu informa Henny desde chikito a cuminsa haya interes den auto y esaki a inicia for di 12 aña di edad. Na momento cu Henny a jega na e edad di 15 aña ela cuminsa juda su tata riba su auto cual tabata un Nash modelo 1936. Despues Henny tabata bai yuda un mecanico, un cierto Juan Hoevertsz na Seroe Patrischi y eynan ta na unda cu su interes pa cu dia pa dia a bira mas grandi. Mas despues ora cu school caba Henny diariamente tabata traha den un garage di un tal señor Adith Perez unda ela siña con pa saka sla di auto y spuitmento y asina Henny a bira un “junior mechanic”
Papiando di pustamento di auto riba Aruba hopi hende lo por corda ainda cu antes ta pusta auto di San Nicolas pa Playa pasando na Pos Chiquito, despues sigi pa Barcadera parti paden y bayendo pa vliegveld y terminando unda cu awe ta e rotonde di Las Americas. Henny su pasion pa pusta auto e tempo ey tabata grandi y den añanan 60 a lanta Leo’s Racing Team conhuntamente cu su amigo Shon Pa ( Juan Jose Federick Lopez) kende tambe ta gusta pusta auto. Amigonan di Henny antes den pustamento di auto tabata entre otro Shon Pa Lopez, Chico Croeze, Zeppy Macherowski, Selvin Houtman Edwin (Djais) Orman, Sha Orman, Eduardo de Kort, Ata Broadbelt, Betty Croes y Winston Jackson, kende por cierto tabata e prome Arubiano cu e jega di pusta auto ilegal na Corsou riba e caminda di Nieuwe Haven y despues na Bullenbaai.
Despues cu a construi Aruba Caribbean Hotel na aña 1957 y a traha e boulevard existente a cuminsa cu pustamento di auto ilegal tanto den dia como anochi y cuminsando for di DOW (playa) te cu Malmok cual tabata un trayecto basta largo. Henny Leo cu Shon Pa Lopez tabata e actornan principal den pustamento pero Henny mes tabatin e funcion masha peligroso, esta sinta na banda como nabegante den e auto concerni. Ken por corda ainda e auto Caballo Blanco? Tur e aventuranan aki durante añanan largo pasobra no tabatin un pista na Aruba. Barcadera tambe e tempo ey tabata un lugar di pustamento di auto pero peligrosisimo y te ainda.
Pa hasi e pustamento di auto legal na Aruba Henny y algun amigonan a dicidi di lanta un organisacion cual a ser formalisa dia 18 di september 1963 bou e nomber Aruba Racing Association (ARA). E miembronan e tempo ey tabata Srs. Zepp Macherowski, Ronny Toppenberg, Chico Croeze, Jossy Flanegin y Henny mes. E organisacion aki e tempo ey den tur forma a busca pa haya un tereno pa por traha un pista, segun mi na Modanza, no a resulta y poco poco e organisacion mes a desparece.
Henny en todo caso no a para keto y den añanan 70 a lanta diferente compania of negoschi relaciona cu drechamento di auto of truck of autonan pa pusta y fuera di e negoschi di Leo’s Towing Henny a cuminsa cu un yunkyard (sloperij) pa bendemento di pieza di auto segunda mano.Den su garage na Santa Cruz Henny y su yiu Giovanni pa añas largo tabata prepara diferente autonan di drag pa nan bai pusta na Corsou, duna nan conseho y hasta yuda nan mas tanto cu ta posibel. Ta bon pa menciona cu Leo’s Racing Team, bou guia di Henny tabata tambe e prome Racing Team di drag di Aruba cu a participa den caredanan na Corsou.
Bayendo den e deporte di drag por corda cu dia 10 di juni 1971 e fundacion SAMS (Stichting Aruba Motor Sport) a keda lanta dilanti notario E.L. Lacle cu e miembronan kendenan tabata: Henny Leo, Francisco Croeze, Freddy Lopez , Frans Varis y Sylvio Varis. Na principio tabata e idea di traha un pista di drag di 800 meter largo riba un tereno na Arikok, bou e titulo di Golden Drag Way pero esaki no por a continua of finalisa pa motibonan di naturalesa y aspectonan Ambiental. Por cierto basta trabou a wordu hasi e tempo ey riba e tereno menciona
Cu cooperacion di gobierno y otro instancianan a logra despues di haya un tereno na San Nicolas esta na Palo Marga y eynan trabounan di construccion a cuminsa inmediatamente cu yudansa di gobierno y empresarionan local y cooperacion di e gran persona Ho Sing Loy y Arubaanse Wegenbouw.
SAMS e tempo aya tambe a cuminsa hanya problema interno y esaki a conduci cu e trabounan na Palo Marga a stop y no tabatin movecion mas. Tur cos a keda status quo pa basta tempo. Den añanan 80 y 81 SAMS a wordu reorganisa cu nombramento di un Directiva nobo y cu participacion di varios miembronan existente, entre otro sr. Henny Leo , Freddy Lopez, Frans Varis y Sylvio Varis. Miembronan nobo tabata sr. Richard Mercera y suscrito. Mi entrada como miembro di Directiva tabatin un solo meta esta: Bin cla cu e pista di drag na Palo Marga cual a sosede tambe
Pa mi por hasi e storia cortico mi por menciona cu e motornan grandi di e Proyecto aki ta: Sr. Wim van Helvoort y Michel Deams di Arubaanse Wegenbouw, Sr. Richard Mercera di DOW , Gobierno di Aruba, gobierno di Aruba, Bestuur completo di Stichting Aruba Motor Sport y en especial Sr. Henny Leo kende a coordina y guia henter e proceso di construe e pista na Palo Marga y di comienso te cu final. Henny hopi danki pa esaki.
Ta pesey mes merecidamente su Majestad Rey Willem Alexander a otorga na Sr. Hendrik Federico (Henny) Leo e ordo di “Lid in de orde van Oranje Nassau”. Un reconocimento na su lugar di un gran deportista Arubiano. Henny Leo, un biaha mas un caluroso felicitacion cu bo 87 aña di edad hunto cu bo famia y amistadnan. Dios bendiciona bo y hopi aña mas di bida. Mi kier accentua si cu door un fout e nomber di Sr. Juan Werleman, otro miembro prominente di SAMS a cai afo. Den mi proximo articulo lo mi bai extenso riba e gran trabou cu Juan Werleman, den felis memoria, a desplega pa cu e pista na Palo Marga.
Andre Wernet
Ex-miembro SAMS y di Aruba y di Stichting
International Raceway Park Palo Marga
