ORANJESTAD – Na aña 2015 Fundacion Guia Mi (FGM), a base di un necesidad grandi pa opvang pa mucha cu un limitacion, a acerca Centro pa Desaroyo di Aruba (CEDE) y a forma hunto cu Stichting Verstandelijke Gehandicapten Aruba (SVGA)y Stichting Algemene Bejaardenzorg Aruba (SABA) un stuurgroep cu na 2016 a realisa e “Business Case 24-uursopvang en zorg voor mensen met verstandelijke- en/of meervoudige beperkingen op Aruba”. E business case a wordo skirbi door di Cornerstone Economics. CEDE Aruba a acerca Samenwerkende Fondsen na Hulanda pa fondo pa por yuda realisa e projecto.
SAF a wordo acerca door di FGM y CEDE Aruba na aña 2017 pa ehecuta e projecto. Stichting Ambiente Feliz (SAF) tin 35 aña di experiencia trahando cu persona cu limitacion mental y tawata consiente di e necesidad grandi pa un opvang pa persona cu un limitacion (multiple). Na aña 2018 e Sociaal Crisisplan a brinda e oportunidad financiero pa e projecto por wordo realisa.
SAF ta orguyoso di por anuncia, despues di un trajecto largo, e apertura di e prome fase di e projecto na Centro di Cuido. E prome fase, un woonunit pa menor di edad entre 6 cu 18 aña, tin espacio pa un total di 6 mucha. Fase 2, un woonunit pa adulto entre18 aña y 55 aña di edad, tin espacio pa 6 persona. E intencion ta pa ehecuta fase 2 e aña aki tambe. Na 2022 SAF ta spera di por habri e di 3 woonunit pa adulto di 55 aña bai ariba. E woonunit aki lo ofrece lugar na 8 cliente nobo.
E localidad lo bai tin su propio pasa dia completamente adapta na e grupo di meta y lo bai wordo ehecuta den cooperacion cu SVGA. Guia di SAF y SVGA (Bipito Pin) lo bai traha hunto na bienestar di nos grupo di meta y ofrece actividad y therapia cu sosten di Mickey’s Foundation. E intencion ta pa start cu e pasa dia e aña aki ainda.
E team di profesional nobo ta consisti di un unithoofd, (assistent)woonbegeleiders, verpleegkundigen, huishoudelijk medewerkers y un faciltaire medewerker. Bou liderasgo di un unithoofd Ambiente Feliz lo bai yama bon bini na nos clientenan pa fase 1 dia 13 di september venidero.
E Comision di Indicacion y Internasion pa Residencia y pa Guia den Dia di Persona cu Limitacion Intelectual, ta esun responsabel pa indicacion y internasion di cliente nobo. No solamente pa e projecto nobo na CDC, pero pa full e gehandicaptenzorg na Aruba. E proceso aki, cu ta un proceso ariba su mes, lo indica tambe e momento cu por inicia fase 2 y 3.
SAF no por a realisa e projecto aki sin e fondo disponibel di Sociaal Crisisplan y fondo adicional di Samenwerkende Fondsen y CEDE Aruba. Nos ta contento cu tur stakeholder a reconoce e importancia di e projecto aki na unda e derecho universal di e persona cu un limitacion ta wordo respeta. Danki na FGM pa nan determinacion y input, e familiarnan cu ta pone nan confiansa den SAF pa cu e cuido di nan yui y tur cu ta kere den e projecto.
SAF a ricibi e oportunidad pa por contribui na e ampliacion y specialisacion di cuido pa nos grupo di meta cu ta persona cu limitacion mental. Pero e fundacion ta depende di ayudo (structural) pa por brinda mas servicio. Un donacion lo yuda realisa mas actividad, cumpra mas material specialisa y yuda ehecuta mas projecto chikito na bienestar di e clientenan. Si ta desea por hasi un donacion na nos cuenta di CMB bou nomber di Stichting Ambiente Feliz, nr di cuenta: 20906501. Pa mas informacion por yama libremente na 5858738 y puntra pa e directora sra. Althea Schmidt.
Por ultimo SAF kier gradici Aruba Wine & Dine Hospitality Group, Paradera Party Center, Andina Ice, Medwork Caribbean N.V., JasonCR Computer Services Aruba, Elsa’s Flowershop, Smit & Dorlas Caribbean N.V. y sr. Nico Connor pa nan contribucion na nos apertura.
