Aprecio, y balor ta mustra cu bo ta respeta locual cu bo a ricibi, y sea agradecido na Esun cu a duna bo.
Tur cos bon ta bini di Dios, Kende ta donjo di tur cos.
Locual Dios duna na nos ta pa nos balora, y aprecia, y cuida,pasobra despues nos tin di duna cuenta na Dios, pa locual cu e a duna nos.
Esun cu cuida locual e a ricibi, lo hanja mas aserca, pero esun cu no ta aprecia, tampoco cuida y ta trata con cu ta,lo no crece.
Bo no ta depende di hende, pero bo ta depende di Dios, Kende ta wak tur cos, pasobra caminda tin flohera, y manipulacion, tur cos ta keda para.
E talento cu Dios a duna, na prome lugar e mester wordo usa, pa alaba Dios, pasobra ta di gracia nos a hanje.
Si nos bay bek den testament bieu un talento tabata 34 kilo of 75 liber di oro of plata.
Awendia oro ta wordo bendi na Troy ounce na un balor di mas cu US$ 3500,00 pa ounce.
Saca cuenta pa bo mes cuanto ons tin den un liber y cuanto liber tin den un kilo.( Mateo 25:14-30).
Cu un calculacion rapido un talento di testament bieu , ta haci un hende miyonario awendia.
E talento cu Dios a duna nos tin gran balor, esun cu huse bon ta hanja mas aserca, pero esun cu malusa ta perde tur cos, y esun cu laga flohera domina su bida, no ta bay ningun caminda, y na final lo e carga nomber so, pasobra locual e tin e a perde.
Si Dios a duna bo un talento pa toca un instrument, bo mester hacie lo mihor cu bo por, y sinja otro nan tambe pa hacie, no ser egoista, y tene pa bo so, pasobra ora bo sinja otronan , bo a haci boluntad di Dios.
Pero si bo cohe un actitud, cu locual ta dimi, ta dimi, un actitud egoista, bo mes ta aparta hende for di bo.
Si bo cuminsa pensa, cu tur locual bo ta haci hende mester paga bo, pasobra si no pagabo , bo no ta hacie, bo no ta aprecia locual cu Dios a duna bo, pasobra Dios no a cobrabo pa bo talento.
Aprecia y Balora ta conta pa tur cos den nos bida, na prome lugar nos mester balora nos bida, y no haci cosnan cu ta perhudica nos, por ehempel, e asunto di bebe, droga, parandia, cual ta final ta traha contra nos salud.
Esaki tambe ta conta pa nos Salbacion, laga balora nos salbacion cual nos a ricibi pa gracia,nos no a paga pe, ni tampoco nos bon obranan no a hiba nos na salbacion, pero danki na Dios cu manda Su Yiu unigenito pa ken cu kere den dj’E ta salba y tin bida eterna.
Aprecia y balora bo Matrimonio y bo Famia.
Bo tabata sa cu Aprecio tin mas balor cu placa, esun cu ta aprecia ta cuida, ta stima y ta pordona.
Placa no ta tur cos, ora e yiu perdi a dicici di bay cas, pasobra e sa cu na su cas nan ta aprecie, y e mes a bisa , cu nan cas di mi tata , hasta e crianan ta biba miho cune.
Tur locual nos ta aprecia den nos famia, ta nos mes nos ta aprecia, tur locual Dios a duna nos, nos mester aprecia, hasta ora un mata wordo aprecia e ta crece, y saca flor bunita, pasobra aprecio, ta fundeshi di tur crecemento, no ta locual bo tin, ta e manera con bo ta trata hende.
Sinceramente, Pastor Marcel Balootje
