Diahuebs atardi, weganan di clasificacion pa Copa Mundial Qatar 2022 a continua, e biaha aki den zona di Latino Americano (CONMEBOL) unda cu 5 wega a tuma lugar.
Un di e weganan cu a haya atencion ta e wega di Argentina contra di Venezuela, Argentina ta actual campeon di Copa America a yega Venezuela cu e meta di sigui na di dos lugar riba tabla di posicion.
Venezuela te na e momento aki no a inicia e weganan aki riba mihor manera y solamente tin 4 punto mientras cu Argentina tabata tin 13 punto.
E wega aki tampoco a cuminsa na e mihor manera pa Venezuela ya cu na di 32 minuut su hungador Luis Martinez ta haya carchi cora direct y asina Venezuela a keda cu 10 hungador for di prome tempo, e defensa di Venezuela a keda wanta e atakenan di Argentina pa basta rato, den minuutnan extra di prome mitar, Giovani lo Celso ta duna Lautaro Martinez un tremendo pase caminda Lautaro ta anota e prome gol di wega pa Argentina bay ariba cu score di 1-0.
Asina tambe prome mitar a termina cu score di 1-0 na fabor di Argentina.
Den di dos mitar, Argentina tabata pone mas presion riba defensa di Venezuela ya cu nan tabata probecha di e ventaha di tin un hungador mas riba tereno.
Tabata na di 71 minuut, anotador di prome gol, Lautaro Martinez ta duna Joaquin Correa un pase caminda cu Juaquin Correa ta haci e wega 2-0 pa Argentina.
Na di 74 minuut, Argentina ta anota su di tres gol di wega pa medio di Angel Correa cu a haci e wega 3-0.
Venezuela den minuutnan extra na final di wega ta haya un tiro penal caminda cu Yeferson Soteldo ta anota e gol di salba honor pa Venezuela.
Asina tambe e wega a termina cu score di 3-1 na fabor di Argentina cu ta keda mantene e di dos puesto awor cu 15 punto, mientras cu Venezuela ta keda na di ultimo lugar riba tabla di posicion cu 4 punto.
Den wega mas trempan, Colombia a empta 1-1 contra di Bolivia den un wega dificil cu a tuma lugar den ciudad di La Paz na Bolivia y Ecuador ta gana Paraguay 2-0 na ciudad di Quito.
