Mientras cu e wega di Argentina y Venezuela tabata den descanso, Chile a enfrenta Brazil na ciudad di Santiago.

Brazil tabata solido na prome lugar cu 18 punto mientras cu Chile tabata na di 7 lugar cu 6 punto, pero ta cerca di esnan cu ta den zona pa clasifica.

Den prome mitar, Brazil tabata toca e bala hopi den medio campo y na algun ocasion a yega di forma peliger dilanti di gol defendi pa Claudio Bravo di Chile, pero Claudio cu ta un keeper veterano a sa di mantene su gol limpi den prome mitar.

Prome mitar a bay den descanso cu score empata 0-0, cu solamente 1 carchi geel cu tabata pa hungador di Brazil.

Den di dos mitar e wega a bira mas bruto, na di 64 minuut, Brazil ta bay ariba cu score di 1-0 gol anota pa Everton Ribeiro den un hugada caminda e rechazo no a bin na ora di parti di Chile.

Despues di e gol aki, un total di 7 carchi geel a keda duna den di dos mitar pa asina e total di carchi geel a keda 8.

Asina tambe e wega a termina cu score di 1-0 na fabor di Brazil kende ta mantene su invicto den weganan di clasificacion di Copa Mundial Qatar 2022 y awor ta yega 21 punto mientras cu Chile ta keda cu 7 punto.

Brazil tin 21 punto y esaki ta solamente den prome parti di e weganan di clasificacion, si Brazil gana su weganan cu falta den prome mitar e lo por clasifica caba pa mundial den prome buelta di e weganan aki.

Ultimo wega di dia tabata entre Peru y Uruguay cual wega a tuma lugar na ciudad di Lima y a keda empata 1-1.

Cu e empate aki Uruguay ta na di cuater lugar cu 9 punto mientras cu Peru ta keda na di nuebe lugar cu 5 punto.

LEAVE A REPLY

Please enter your comment!
Please enter your name here