Diasabra ultimo, 25 di april, Aruba Taekwondo Association (ARTBO) a skirbi un capitulo nobo den historia di nos deporte nacional cu e celebracion di su prome Campeonato Nacional 2026. E evento, cu a tuma lugar den Compleho Deportivo Frans Figaroa, tawata un dia caminda e disciplina y e talento di nos atletanan a briya mas cu nunca, dunando bida na un jornada marca pa union y excelencia deportivo.
E campeonato a conta cu participacion activo di seis scol di Taekwondo di Aruba: San Nicolas Taekwondo Center, Caribbean Taekwondo Institute, Chaco Taekwondo Academy, Tiger Taekwondo Academy, Impact Taekwondo y Estrella Taekwondo & Martial Arts Foundation. E competencianan den Poomsae y Kyorugi tawata un demostracion bibo di e nivel halto y e dedicacion di cada coach y nan respectiva scolnan.
ARTBO ta felicita cordialmente tur e atletanan cu a duna nan maximo esfuerso riba e mat. Boso determinacion y spirito di “fair play” ta loke ta engrandese e deporte di Taekwondo na Aruba.
ATLETANAN CU A RESALTA:
Poomsae – Forms:
- Best Cadet: Rebecca Puente (Chaco Taekwondo)
- Best Junior: Allison Pava Escobar (Estrella Taekwondo)
- Best Senior: Jose Hernandez (Caribbean Taekwondo)
- Best Team/Pair: Rachelle Rodriguez & Ayzic Rodriguez (Impact Taekwondo)
Kyorugi – Combate (Masculino):
- Best Infantil: Mauricio Gomez (Estrella Taekwondo)
- Best Cadet: Xamier Lake (San Nicolas Taekwondo)
- Best Junior: Antonio Estillore (Estrella Taekwondo)
- Best Senior: Richard Cambar (Impact Taekwondo)
Kyorugi – Combate (Femenino):
- Best Infantil: Engelly Bislip (Tiger Taekwondo)
- Best Cadet: Franyelis Reynoso (Tiger Taekwondo)
- Best Junior: Emmily Saldarriaga (Estrella Taekwondo)
- Best Team & Best Crowd: Estrella Taekwondo & Martial Arts Foundation
Un evento di e caliber aki ta rekeri un ekipo solidario tras di cortina, y ARTBO ta expresa su gratitut profundo na:
- Voluntarionan y Directiva di ARTBO: Pa nan esfuerso incansabel den preparacion y maneho di e evento.
- Cuerpo di Arbitro: Pa nan profesionalismo, imparcialidad y compromiso cu e reglanan.
- Maestro di Ceremonia, Lysander “Manolo” Besselink: Pa a guia e evento cu energia y dinamismo.
- Glennon Eights Soundsystems: Pa e excelente calidad di sonido durante henter e dia.
- Dr. Vladimir Suarez: Pa su presencia y supervision medico, garantisando siguridad pa tur atleta.
- Mayornan, Fans y e “Best Crowd”: Cu a yena e tribuna cu emocion y a curasha e atletanan na tur momento.
Nos ta extende un gradicimento na tur nos partners y stakeholdersnan pa nan apoyo constante, como tambe na e fotógrafonan y miembronan di prensa presente cu a inmortalisa e momentonan grandioso aki.
E Campeonato Nacional 2026 a confirma cu ora nos traha hunto como un famia deportivo, e resultadonan ta extraordinario. Nos ta sigui cu mas forsa y entusiasmo, preparando desde awor pa e siguiente logronan cu lo sigui hiba Taekwondo di Aruba na un nivel mas halto.
