For di diahuebs Aruba ta anfitrion di e di 21 edicion di e Foro di e Paisnan y Teritorionan Ultramar – Union Europeo, un plataforma internacional importante pa dialogo entre Union Europeo y su Paisnan y Teritorionan Ultramar (Overseas Countries & Territories – OCT’s). Durante e dianan aki e lidernan, e diplomaticonan y e representantenan di sector publico y priva a reuni pa discuti varios tema crucial manera sostenibilidad, cambio di clima y desaroyo economico.
Durante e ultimo dia di e foro, Prome Minister mr. Mike Eman hunto cu Comisario Europeo Jozef Síkela a comparti un vision comun: un partnership mas fuerte, mas strategico y enfoca rib’e resultadonan concreto.
Un di e anuncionan mas importante tabata e desicion pa casi redobla e fondo Europeo pa e OCT’s—di €500 miyon pa €999 miyon. Segun Jozef Síkela, esaki ta representa un cambio fundamental: e partnership aki no ta wordo mira mas como un obligacion di desaroyo, sino como un inversion strategico den futuro y resiliente.
Durante e foro a lansa varios programa concreto enfoca riba sostenibilidad, biodiversidad, maneho di calamidad y desaroyo di sector creativo.
Prome Minister mr. Mike Eman a enfatisa e progreso real logra durante e dianan di dialogo. Eman a indica cu e foro no solamente a keda den discusion, pero cu ya caba tin vario paso concreto pa bay dilanti cu diferente iniciativa.
Un punto di enfoke tabata e transformacion di e area di refineria na San Nicolas. Un proyecto cu no solamente tin su retonan, pero tambe varios oportunidad grandi pa desaroyo sostenibel y crecemento economico. E proceso aki ta yuda fortifica door di un colaboracion estrecho entre Aruba, Hulanda y Union Europeo, cu enfoke riba bon gobernacion, inversion y ehecucion.
Ademas a destaca e importancia di sector priva den e siguiente fase, unda partnership y inversion lo ta clave pa converti e plannan den proyectonan concreto. Union Europeo a mustra interes pa no solamente contribui financieramente, pero pa bira un partner activo den e proceso, cu sosten tecnico y experencia.
Tambe e foro a confirma e reconocimento internacional pa Aruba, como resultado di añanan di trabou pa fortifica su posicion den Union Europeo y crea oportunidad pa dialogo y colaboracion.
Mas cu un evento, e Foro OCT-EU ta marca un punto di salida pa un fase nobo, unda cu vision ta bira accion y plannan ta bira realidad cu Aruba como un partner fuerte y un brug entre Europa y Caribe.
Tocante OCTA/OCT-EU Forum
The 21st Overseas Countries and Territories – European Union Forum
Durante april 2026 Aruba lo ta anfitrion di e di 21 edicion di Overseas Countries and Territories – European Union Forum, un plataforma internacional pa dialogo entre Union Europeo y su Paisnan y Teritorionan Ultramar (LGO).
E foro ta reuni formuladornan di maneho, diplomaticonan y representantenan di sector publico y priva pa discuti temanan strategico manera cooperacion sostenibel, cambio climatico y transformacion digital.
Como Pais y Teritorio Ultramar, Aruba tin un rol unico como brug entre Europa y region Caribe. E foro ta brinda un oportunidad pa fortalece cooperacion y intercambio entre partnernan internacional.
