Aruba Excellence Foundation ta asisti Scol Basico Cacique Macuarima cu ‘Mi Zjeito’di A.C.P.

0
12

Manera ta conoci, na comienso di aña Aruba Excellence Foundation (A.E.F.) y Stichting Katholiek Onderwijs Aruba (S.K.O.A.) a sera un colaboracion den cual S.K.O.A. a compromete su mes pa certifica full e team di maestro y personal di e fundacion participando den e Aruba Certification Program (A.C.P.) Mientrastanto, tin varios scol di S.K.O.A. di cual ja caba tur e maestronan ta ‘A.C.P. certified’. E siguiente paso den e colaboracion aki, ta pa introduci e material y e programa di A.C.P. den klas serca e muchanan. Pa por haci esaki posibel, A.E.F. a aserca e directora di Instituto Pedagogico Arubano (I.P.A.) caminda e team di Centro pa Desaroyo Profesional Continuo (CDPC) di departmento di Professionalisering a colabora cu e team di A.E.F. pa prepara un programa piloto cu a haya e nomber ‘Mi Zjeito’.

Scol basico Cacique Macuarima a logra di certifica full e team na Januari di e aña aki y pues a wordo aserca pa participa den e programa piloto aki. E programa piloto ta encera cu e cabesante y maestronan a haya un training for di e team di I.P.A. conhuntamente cu e team di facilitadornan di A.E.F. E training aki tabata consisti di incorpora e material di e programa di A.C.P. den e programa existente di e scol, teniendo na cuenta cu aplicacion di “21st century teaching” den klas y adapta e programa di A.C.P. na nivel di e mucha incluyendo e asina jama ‘didactische werkvormen’ nobo. Ademas a tene cuenta pa sigur tambe conecta e programa di tal forma cu tin conexion cu e ‘kerndoelen’ nacional stipula pa Directie Onderwijs.

Finalmente e maestronan a ehecuta e programa piloto ‘Mi Zjeito’ den e ultimo siman di scol, como programa di ciere.

Di un forma interactivo a siña muchanan di eerste y vijfde klas diferente caracteristica di nos dushi isla den transcurso di un siman.

E programa piloto ‘Mi Zjeito’ a tuma lugar entre 28 di Juni te cu 2 di July. Cada dia tabata tin un topico specifico acompaña cu un lezing y tambe uitstapje. Durante di e siman a laga e muchanan cera conoci cu cada balor di Aruba su Zjeito, cual ta e guia principal di e training di A.C.P.

Kico ta Zjeito?

E palabra ’zjeito’ ta nifica ora cu un persona ta sea presenta, canta of baila cu hopi smaak. Den e programa di A.C.P. a identifica 9 balor cu ta destaca y cual ta wordo refleha den e manera unico cu nos ta brinda servicio. E 9 balornan ta Amor, Union, Autenticidad, Orguyo, Conserva, Libertad, Carisma, Celebra y Creatividad. Brinda servicio a base di e balornan aki, kermen cu bo ta brinda servicio cu Aruba su ‘Zjeito’. Esaki ta un caracteristica intangibel cu nos tin cu keda mantene como pais y destinacion turistico. Pa esaki, ta hopi importante pa inculca e balornan di Aruba su Zjeito ja caba na un edad chikito.

Contenido di e programa piloto ‘Mi Zjeito’

Ariba Dialuna a duna un presentacion cortico di Aruba su Naturalesa y di un forma hopi simpel a splica un poco di Aruba su geologia, y tambe di flora y fauna. Despues a cana cu e muchanan rond di scol pa por experencia e naturalesa cu tin, mientras cu nan ta cana cu un ‘checklist’ y nota ki tipo di mata of bestia nan ta mira rond. Tambe a hiba nan Cas di Torto den cercania. Esey no ta tur, nan a piki sushi tambe, di e manera aki a concientisa e muchanan e importancia pa mantene nos isla limpi. Algo cu e muchanan tambe a haci durante di e caminata ta, piki material cu nan ta wak den naturalesa cu lo por ta usabel pa nan por crea musica cune como parti di un opdracht di e programa mas en adelante durante di e siman.

Ariba Diamars e muchanan a ricibi un rondleiding na Casa Del Mar, y tambe a ricibi e presentacion di Aruba su turismo y servicio cu Zjeito. Na momento cu a yega hotel, e Gerencia General a sali pa yama e grupo di Cacique Macuarima bon bini, y a laganan cera conoci cu e guia cu lo pasa cu nan na cada departamento cu ta opera na hotel, incluso a laga e muchanan wak con un camber ta mustra.

Diaranson mainta e muchanan a wordo sorpresa pa artista local/internacional ‘Jeon’ cu a comparti un rato hopi agradabel cu e muchanan. Como uitstapje a hiba e muchanan explora e naturalesa na Spaans Lagoen y tambe mina di oro na Balashi.

Diahuebs nan a ricibi un lezing tocante e industria di aloe y di fosfaat, cual tabata dos industria importante cu Aruba tabata tin antes pa genera entrada.

Riba e ultimo dia di ‘Mi Zjeito’, a comparti cu e 44 muchanan un mini island tour virtual por medio di VR goggles.

Presentacion final & Certificacion

E klasnan 1A y 5A a duna un presentacion final di tur loke nan a siña durante transcurso di full e siman dilanti di henter e scol. Klas 1A a presenta un ‘Rap’ cu musica usando e materialnan cu e muchanan a colecta anteriormente. Klas 5A a prepara un ‘sketch’ y nan a visualisa con pa test e conocemento di Aruba serca nos turistanan, na final di nan estadia por medio di un quiz cu ‘Kahoot’ cu e muchanan a hinka den otro. Tambe a presenta na henter scol kico nan a haci y siña durante di e siman. A finalisa e dia cu certifcacion di 44 alumno cu awe tambe ta embahadornan di Aruba y cu ta ‘A.C.P. Certified’. Un pabien ta bai na tur maestro y alumno cu e logro aki.

Programa ‘Mi Zjeito’ den futuro

A.E.F. su deseo ta pa pronto lo tin mas scolnan, incluso di otro directiva di scol, cu tambe lo participa cu e programa di certifacion di Aruba A.C.P. pa asina nan tambe por inclui e programa di ‘Mi Zjeito’ na nan skol. Awor a skohe pa ofrece e programa ‘Mi Zjeito’ como programa di ciere di aña escolar, pero e scolnan por opta pa brinda e programa aki durante otro momento di e aña escolar.

Un danki ta bai na e cabesante di scol basico Cacique Macuarima juffrouw Rachelle Caster cu hunto cu su team, juffrouw Jasmine Kelly (IB-er), juffrouw Carina DeLany di 1e klas y juffrouw Vanessa de Cuba di 5e klas a sa di draai e programa piloto ‘Mi Zjeito’ exitosamente y cu hopi entusiasmo.

Un danki tambe ta bai na Directiva di I.P.A. sra. Marylin Richardson y sra. Marisol Croes y e team di CDPC, caminda sra. Nishenou Felix a traha hunto cu e facilitadornan di A.E.F. pa percura pa un programa dinamico y educativo pa maestro y alumnonan.

Finalmente, un danki ta bai na Directiva di S.K.O.A. sra. Anuesca Baly y sra. Cavril Martijn, cualnan for di prome instante a brasa e programa di certificacion A.C.P. cual a pone cu por a trece esaki pa tur maestro y alumno.

Aruba Excellence Foundation a wordo institui door di Aruba Tourism Authority na juni 2018 y ta e fundacion encarga pa entre otro ehecuta e Aruba Certification Program (A.C.P.) como tambe e programa di Happy Information Officers (H.I.O.). Meta principal di e fundacion ta pa sigui desaroya y implementa A.C.P. y H.I.O. como tambe otro programanan specialmente diseña pa certifica personanan cu ta traha den sector di servicio y hospitalidad, pa asina percura cu e nivel di servicio excelente di Aruba ya bon conoci, por keda riba un nivel halto.

LEAVE A REPLY

Please enter your comment!
Please enter your name here