Gerencia di Marriott Stellaris Resort ta compromete pa certifica 750 asociado e aña aki.

Durante un rueda di prensa awe tardi na Marriott Stellaris Resort, directora di Aruba Excellence Foundation, sra. Esther Broeksema, a anuncia un campaña nobo ‘E efecto di bo zjeito’ pa loke ta trata un descuento grandi di 50% pa certificacion di A.C.P y e Complex GM di Marriott sr. Raoul Lemmerling a expresa su compromiso pa certifica 750 asociado, incluso full e executive team, e aña aki. CEO di ATA sra. Ronella Croes a reitera e importancia di a institui e fundacion A.E.F. cu conhuntamente cu su hunta di directiva ta maneha, desaroya y ehecuta entre otro e programa di certificacion A.C.P.  

A.E.F. ta conciente di e echo cu Aruba ta enfrentando un periodo cu diferente reto y desicionnan cu por tin un impacto den tur sector ariba nos isla. Esakinan no solamente por tin un influencia ariba e desaroyo di e indrustria di Turismo, pero tambe potencialmente ariba e forma di biba di cada un di nos, awe y den futuro.

Industria di nos Turismo conoce un desaroyo hopi grandi den transcurso di 50 aña y e desaroyo ta continua. E pandemia di COVID-19 a demostra cu e industria aki ta y lo keda nos pilar di economia y como tal a bira evidente un bes mas, e importancia di servicio excelente. Amabilidad y cordialidad ta caracteristicanan indespensabel di nos servicio y lo mantene nos imagen di ‘One Happy Island’. Conhuntamente nos mester logra cu e efecto inolvidabel cu Aruba tin ariba nos bishitantenan prevalece y, cu nan kier bolbe, manera por lo menos 40% di nos turistanan ta haci caba.  

Durante transcurso di 10 aña, mas cu  9 mil persona a certifica cu e programa di certificacion A.C.P. cual a wordo diseña den prome instante pa personanan cu ta traha directo of indirecto den sector di Turismo. Meta principal di e programa ta pa duna informacion corecto, uniforme y consiso tocante Aruba su historia, cultura y tradicionnan como tambe brinda servicio excelente cu Aruba su zjeito.

Mirando e importancia di nos industria turistico, A.E.F. ta di opinion cu e programa di certificacion A.C.P. idealmente wordo carga pa diferente sector como tambe gremionan riba nivel nacional. 

Durante pandemia, A.E.F. a ofrece e programa di certificacion 2 aña gratuitamente. Considerando e echo cu e pandemia no a bai laga nos completamente ainda, y cu nos pais ta enfrentando retonan dificil, A.E.F. ta sigui contribui su granito y ta ofrece e programa den e lunanan aki, Juli te cu October 2022 na 50% di descuento. Pues en bes di Afl. 100,- pa persona, awor e prijs ta Afl. 50,- pa persona. 

E programa ta encera 6 sesion di cada un 1 ora maximo. E contenido ta lo siguiente:

  1. Virtual 360 island tour
  2. Aruba su naturalesa y hende
  3. Aruba su historia y cultura
  4. Aruba su turismo
  5. Servicio Excelente: E bishitante
  6. Servicio Excelente: E bishitante y ami

A.E.F. su vision ta pa mira un Aruba unda tur hende cu ta biba y traha ariba nos isla, ta motiva pa ta un embahador orguyoso di Aruba, y cu por crea un experencia inolvidabel pa cada bishitante di nos pais. 

Di e manera aki comprometiendo su mes y contribuyendo na e adelanto di nos pais.

Pa mas informacion y registracion pa e programa di certificacion por tuma contacto cu oficina principal di Aruba Excellence Foundation na number 280 2924 of email info@acp.aw

Tambe por bishita www.acp.aw pa registracion online y usa e discount code ‘zjeito’.

Aruba Excellence Foundation a wordo institui door di Aruba Tourism Authority na juni 2018 y ta e fundacion encarga pa entre otro ehecuta e Aruba Certification Program (A.C.P.) como tambe e programa di Happy Information Officers (H.I.O.). Meta principal di e fundacion ta pa sigui desaroya y implementa A.C.P. y H.I.O. como tambe otro programanan specialmente diseña pa certifica personanan cu ta traha den sector di servicio y hospitalidad, p’asina percura cu e nivel di servicio excelente di Aruba ya bon conoci, por keda riba un nivel halto.

LEAVE A REPLY

Please enter your comment!
Please enter your name here