Artista Luisa Elena Betancourt a publica su obra ‘Aruba Marine life’ recientemente y ta presenta esaki diaranson dia 9 di maart 2022 na Biblioteca Nacional Aruba. E presentacion ta cuminsa 7or di anochi. Luisa Elena Betancourt ta un artista Venezolano y ta biba na Aruba for di 2016. Luisa ta combina su trabou di artista cu un otro pasion, fotografia bou awa. Sacando potret di bida marino den lama di Aruba, Luisa a yega na un coleccion di potret marino exotico, unico y extenso. Un coleccion di potret di bida marino; pisca, otro bestia, mata y tambe coral. Potretnan den e buki ta acompaña cu un descripcion cortico na Ingles.
Su admiracion pa e bida marino a trece hopi inspiracion y un desaroyo artistico diferente. Varios potret a inspira e artista pa pinta riba canvas y crea arte digital como tambe collages. E buki ‘Aruba Marine life’ ta un prueba di Aruba su bunitesa den lama y ta yuda na conoce tur e diferente criaturanan cu ta biba dilanti nos costanan. Un mundo precioso pa cuida y conserva.
Artista Luisa Elena Betancourt ta casa y e pareha tin tres yiu, Alfonso, Jorge y Luli. Tur ta gusta lama, watersport y snorkling (Scuba diving) en particular. Luisa su lugar preferi pa explora lama ta Mangel halto.
Presentacion ta na Spaño y por haci pregunta na Ingles. Mas informacion di artista Luisa Elena Betancourt, www.luisaebetancourt.com
