Diabierna mainta, den sala di Conseho di Minister na Bestuurskantoor, director di Telearuba, Giovanni Kock, a entrega e bala oficial di FIFA World Cup 2026 na Prome Minister mr. Mike Eman, presente tambe tabata Minister mr. Geoffrey Wever. E encuentro a marca e conteo final p’e campeonato mundial di futbol, cu lo cuminsa otro siman y cu lo por sigui na Aruba pa medio di Telearuba, e canal oficial di mundial di futbol. Durante e encuentro, Giovanni Kock a comparti cu Telearuba ta trahando intensamente hunto cu su team di varios profesional pa garantisa e cobertura di un bon calidad pa tur televidente na Aruba. El a enfatisa cu Telearuba ta e unico canal di television cu tin e derechonan oficial pa transmiti tur e weganan di FIFA World Cup 2026 na Aruba.
Prome Minister Mike Eman a felicita Telearuba p’e gran esfuerso cu nos planta nacional di television ta haci pa pone e campeonato accesibel pa henter nos pueblo. Segun e mandatario, Mundial ta mucho mas cu un evento deportivo. “Futbol ta forma parti di nos cultura. Ta un momento den cual nos comunidad ta uni, famia y amigo ta celebra hunto y unda e lasonan ta fortalece. Pa Aruba y awor specialmente nos isla ruman Corsou, Mundial semper ta un ocasion pa celebra e deporte rey. Manera cu Carnaval, futbol ta un di e momentonan unda nos ta mira hopi harmonia y fraternidad den nos comunidad,” Prome Minister Eman a expresa.
E mandatario a destaca tambe su aprecio p’e inversion cu Telearuba hunto cu SETAR y otro sponsor ta haci pa mantene e transmisionnan disponibel pa pueblo di Aruba, a pesar cu e costo di e derechonan di transmision internacional ta aumentando constantemente. “Ta algo hopi special ora cu nos por sigui e partidonan pa medio di nos propio canal di television, cu nos propio locutornany analistanan cu ta ofrece contenido den nos lenga materno pa nos comunidad. Esaki ta haci e experienca ainda mas cerca y mas significante pa pueblo di Aruba,” el a comenta.
Prome Minister Eman a gradici tambe tur e comerciantenan y sponsor cu ta sostene e cobertura di Mundial, señalando cu nan apoyo ta esencial pa haci posibel cu e campeonato por yega na cas di miles di televidente Arubiano. Cu e FIFA World Cup 2026 acercando, Aruba ta preparando pa un periodo di emocion y celebracion, unda e fanaticonan di futbol lo reuni rond di un solo pasion; esta e deporte di futbol.
