Den cuadro di su bishita oficial na Den Haag, Prome Minister mr. Mike Eman a reuni awe cu Minister di Clima y Medio Ambiente (Klimaat en Groene Groei) di Hulanda, Stientje van Veldhoven. E tabata un dialago extenso tocante e retonan y oportunidadnan grandi cu tin riba area di medio ambiente, sostenibilidad y proteccion di naturalesa.
Durante e encuentro, a dialoga riba e balans cu paisnan manera Aruba mester logra entre desaroyo economico y proteccion di naturalesa. Prome Minister Mike Eman a enfatisa cu Aruba ta conscientemente buscando un modelo di crecimento cu ta crea prosperidad, pero cu na mes momento ta respeta e “grens ecologico” di naturalesa. “Desaroyo economico ta necesario pa crea prosperidad y stabilidad pa nos pueblo, pero proteccion di nos naturalesa ta igual di importante. Nos tin cu busca harmonia entre e dos aspecto aki,” Prome Minister Mike Eman a expresa despues di e reunion.
Den e contexto aki, Prome Minister a comparti cu minister Van Veldhoven diferente iniciativa concreto cu Aruba ta desplegando actualmente, incluyendo e cooperacion structural cu Wageningen University & Research (WUR). Segun Prome Minister Eman, Aruba ta beneficia enormemente di e conocemento cientifico y experticio internacional cu e instituto ta aporta riba tema manera biodiversidad, maneho di naturalesa y sostenibilidad. Entre e proyectonan menciona durante e reunion tabata e plan reforestacion di nos isla cu mas di 100.000 mata, cu ta captando atencion internacional, y tambe e desaroyo di rif artificial y restauracion di coral basa riba investigacion cientifico. Prome Minister Mike Eman a destaca cu e proyecto di coral, cu a cuminsa algun aña pasa, awor ta mustra resultado positivo y concreto. “Tur isla den Caribe ta enfrenta e peliger di perde su coral y rifnan. Si bo perde coral y rif, bo ta perde un ciclo biologico completo. E ta afecta pesca, nos beachan, manglo y finalmente e balans natural completo di nos isla,” e Prome Minister a declara.
Segun Prome Minister Mike Eman, e cooperacion cu instituto manera WUR ta habri porta pa Aruba bira un centro di conocemento y innovacion den region, unda investigacion cientifico y aplicacion practico por bai man den man. Un otro tema importante cu a discuti tabata e maneho sostenibel di naturalesa den Aruba, incluyendo e “goat exclusion zones” pa proteha area natural vulnerabel. Den esaki, Prome Minister a enfatisa cu Gobierno di Aruba ta buscando solucion cu ta respeta tanto e naturalesa como tambe elemento cultural y historico di Aruba. “Cabriton ta forma parti di nos identidad y cultura. Ora bo mira un pintura antiguo di Aruba, semper bo ta mira mata di divi-divi, cunucu y tambe nos cabritonan. Nos kier recupera nos naturalesa, pero den un forma cu tambe ta respeta ken nos ta como pueblo,” Prome Minister Mike Eman a expresa.
E reunion cu minister Stientje van Veldhoven ta forma parti di e esfuerso continuo di Gabinete AVP-Futuro pa fortalece cooperacion internacional riba area di sostenibilidad, innovacion y proteccion di naturalesa, cu meta di crea un Aruba mas fuerte y sostenibel pa futuro.
