Parlamentario Endy Croes ta precupa alrespecto e ultimo desaroyonan. No obstante cu Minister Presidente a acudi na Rijksministerraad diabierna ultimo y a logra entre otro frena e deadline pa cu e precion di Hulanda pa acepta Consensus Rijkswet y Caribische Hervormingsentiteit nos mester keda cu “wowonan” hancho habri den e proceso aki.
Deseo di Hulanda pa Caribisch Hervormingsentiteit: Hulanda a expresa su deseo bon elabora den un documento di 218 pagina. Hulanda ta di opinion cu esaki ta e momento husto pues mei mei den un crisis pa regla tur cos y kier Aruba, Curacao y St Maarten bay di acuerdo cu un Caribische Hervormingsentiteit. Bou di
(1) un solo paraplu. Kiko e entiteit aki lo mester hasi? Entiteit aki lo mester sania, inverti y reorganisa e islanan usando nan expertisio riba desaroyo economico y maneho financiero.
Alaves e entiteit aki ta esun cu lo presta e islanan plaka mara na un cantidad di condicion.
No solamente lo enfoka riba e parti financiero pero lo tin tareanan specifico bou di e titulo
landspakketten den economia, husticia, salubridad y enseñansa. Pues e lo bay hopi mas
profundo cu kisas por a pensa.
Con e entiteit aki ta hinka den otro: Caribische Hervormingsentiteit ta un modelo di ZBO esta zelfstandig bestuursorgaan. Pa por lanta esaki lo mester hasi uso di e “kaderwet zbo’s” di Hulanda pues bou leynan Hulandes y e entiteit aki su adres lo ta na Den Haag Hulanda. Solamente Hulanda por nombra y por kita hende den e entiteit aki di acuerdo cu e Kaderswet zbo’s esta ley Hulandes. E entiteit aki ta cay directamente bou di Minister di Binnenlandse Zaken en Koninkrijksrelaties ( BZK). Alaves Staten General esta Parlamento Hulandes ta esun cu ta eherse e control riba e entiteit aki. Pues Parlamento di Aruba ta uitgeschakkelt.
Hulanda kier forsa Aruba drenta Rijkswet a cambio di un saco di plaka: Enberdad AVP y Mike Eman a causa un desaster cu e pais aki y si no ta pa e desaster aki
Aruba awe no mester mendiga na Hulanda. AVP a presta 2000 miyon florin den 8 aña pero banda di esaki AVP a firma projectonan PPP pa pueblo paga pa e proximo 20 añanan na balor di 82.4 miyon pa aña cual ta igual na 1650 miyon florin. Asina mester accentua cu AVP den 8 aña a percura pa aumenta e debe cu 3650 miyon sin conta projectonan Bo Aruba. Pueblo Bo ta echt mira 3650 miyon riba e isla aki? Si tene na cuenta cu na 2009 MEP a laga e debe nacional na 43% den cuadro di tur standardnan internacional y den apenas 8 aña AVP a manda esaki na 93% esta na rand di bancarota por splika pakiko nos ta para akinan awe. Si Mike Eman a maneha na drechi awe nos no mester pidi Hulanda prestamo. Awor Hulanda kier probecha di problema financiero di
Aruba causa pa AVP y efectonan grandi cu corona virus a ocasiona mundialmente pa pusha Aruba den un direcion cu Aruba no ta desea a cambio pa Aruba haña 204 miyon florin como prestamo. CAFT ( Hulanda) ta na Aruba desde 2014 pa supervisa pero CAFT tambe tabata masha complaciente cu Mike Eman y a laga Mike tuma nan hasi cu cifrasnan fictisio aceptando cresemento economico falso y entrada di Refineria CITGO cu nunka a opera pa asina sera nan begroting pa cumpli cu normanan cu CAFT a impone. Ze stond erbij te kijken! Aruba mester para duro unda nos lo por biba cu un LAFT nobo pero No ta momento pa Aruba bay bek den scochi di Hulanda. Pueblo aki ta prepara pa bisa ayo Bandera, ayo Himno, ayo nos florin?
