Gobierno di Aruba a participa awe den celebracion oficial di Dia di Independencia di Republica di Colombia, un actividad protocolario realisa na Puerto Turistico di Aruba cu a reuni autoridadnan di Aruba y Colombia, miembro di comunidad colombiano, invitadonan special, prensa y publico.
Ceremonia a cuminsa cu interpretacion di Himno di Aruba y Himno di Colombia. Despues, Presidente di Parlamento di Aruba, Marlon Sneek, Prome Minister Mike Eman, Ministro di Turismo, Transporte y Labor Wendrick Cicilia y Consul di Colombia na Aruba, Gustavo Serrano Amaya, a hiba palabra durante e acto oficial. Programa a sigui cu diferente presentacion cultural cu a pone den evidencia e riqueza di musica, baile y tradicion colombiano.
Den su discurso, Presidente di Parlamento Marlon Sneek a destaca cu independencia di Colombia ta representa e balornan di libertad, democracia y soberania. El a expresa reconocimiento pa e importante contribucion cu comunidad colombiano ta haci diariamente na desaroyo economico, social y cultural di Aruba. Tambe el a enfatisa cu Aruba y Colombia ta comparti un relacion fuerte, construi riba amistad, respeto mutuo y cooperacion.
Prome Minister Mike Eman, den su palabra, a reflexiona riba e verdadero significado di independencia. El a indica cu libertad no ta e fin di un proceso, sino e cuminsamento di un responsabilidad comparti pa construi un pais mas husto, unda tur persona por sinti cu nan ta wordo mira, scucha y balora.
E Prome Minister a recorda cu e relacion entre Aruba y Colombia ta bai hopi mas leu cu e creacion di e estadonan moderno. For di tempo di e prome habitantenan di Caribe, lama tabata un caminda cu unia pueblo y comunidad, facilitando intercambio, comercio y encuentro entre diferente cultura. Segun el, e conexion historico ey ta sigui biba awe den e fuerte relacion humano, economico y cultural cu ta uni ambos pueblo.
Mike Eman a expresa tambe su gratitud pa comunidad colombiano, cu diariamente ta contribui na desaroyo di Aruba. El a menciona cu den salud, construccion, comercio, educacion y hopi otro sector, colombianonan ta aporta cu nan talento, conocimiento y dedicacion na progreso di nos isla.
Ministro Wendrick Cicilia a enfatisa cu Aruba y Colombia ta comparti un relacion profundo di cooperacion, amistad y confianza. El a destaca cu miles di colombianonan a scoge Aruba como nan cas y awe nan ta forma un parti indispensabel di nos comunidad.
Ministro Cicilia a resalta tambe e fuerte conectividad entre Aruba y Colombia, cu diferente conexion directo cu ciudadnan colombiano, fortaleciendo turismo, comercio y intercambio entre ambos pueblo. El a reafirma compromiso di Gobierno di Aruba pa sigui construyendo un sociedad unda tur hende cu a scoge Aruba como nan cas por progresa cu oportunidad, siguridad y calidad di bida.
Consul di Colombia na Aruba, Gustavo Serrano Amaya, a comparti un reflexion tocante e historia di independencia di Colombia y e sacrificio di e hendenan cu a haci posible nacimiento di un nacion libre y soberano. El a enfatisa cu libertad ta fortalece cada dia door di democracia, husticia, respeto pa derecho humano y compromiso cu bienestar comun.
Consul Serrano Amaya a resalta tambe cu e celebracion di aña aki ta coincide cu 200 aña di relacion diplomatico entre Colombia y Reino Hulandes, un relacion construi riba dialogo, respeto mutuo, cooperacion y intercambio den diferente area, incluyendo comercio, cultura, educacion, desaroyo sostenibel y siguridad.
Especialmente, el a expresa su gratitud na Gobierno y pueblo di Aruba pa e manera caluroso cu comunidad colombiano a wordo ricibi na nos isla. Segun e Consul, miles di colombianonan a haya na Aruba un luga pa progresa, mientras cu nan, cu nan talento, esfuerzo y dedicacion, a contribui significativamente na desaroyo di Aruba.
Un di e momento mas special di e celebracion tabata e presencia di e bapor ARC 24 de Julio di Armada Nacional di Colombia. E bapor moderno, construi completamente na Colombia, a scoge Aruba como su prome destino internacional, convirtiendo su bishita den un simbolo di e amistad y cooperacion cu ta uni ambos pais.
Despues di e acto protocolario, e presente nan a disfruta di un programa cultural cu musica tradicional, grupo folclorico, baile urbano, poesia y diferente presentacion artistico cu a pone den evidencia e riqueza cultural di Colombia.
Cu e celebracion aki, Aruba y Colombia a reafirma un biaha mas e fuerte relacion di amistad, cooperacion y respeto mutuo cu ta existi entre ambos pueblo. E actividad a confirma e compromiso comparti pa sigui fortalece e relacion historico y humano entre Aruba y Colombia, na beneficio di ambos comunidad y di futuro di nos region.
