Mas confiansa nos tin den Dios,mas autoridad nos tin den Dios, pa e senjalnan sigi nos, nos mester kere profundamente den Dios,pasobra pa medio di Fe nos lo ricibi autoridad di Dios.
Dios ta usa hende humilde pasobra ora nos ta humilde, nos ta depende di Dios, y ora nos ta depende di Dios,nos tin tur cos,cu nos mester.
Si nos tene cuenta cu Moises kende Dios a bisa cu e tabata e persona mas humilde riba mundo, con su comportacion tabata, y con Dios, tabata comunica cu ne , nos lo balora intimidad cu Dios.
Si nos tene na cuenta con Elias tabata papia den nomber di Dios, y con Dios tabata respalda su palabra , nos lo compronde e poder di oracion y intimidad cu Dios, pasobra Elias tabata un persona cu naturalesa mescos cu nos, pero ora e haci oracion Dios ta scucha.( Santiago 5:17-18).
Si nos tene cuenta con Cristo Hesus, Kende aunke cu e tabata existi den forma di Dios, no a considera igualdad cu Dios. Algo pa tene na dje,ma a bandona su mes gloria tumando forma di un sirbido, siendo traha den semehansa di hende, y hanjando Su mes den condicion di hende, E a humiya Su mes door di bira obedecido te na morto hasta morto na un crus.( Filipensenan 2:6-8).
Mas grandi nos intimidad ta cu Dios,mas profundo nos dependencia ta di dj’E,y mas grandi nos autoridad Spiritual ta bira den Cristo Hesus.Pasobra no laga nos lubida, cu e palabra di Dios ta sinja cu pega na Cristo nos por tur cos, y leu for di dj’E nos no por nada.
Hopi hende tin un pensamento religioso cu milagernan ta cosnan di pasado, y esey no ta e berdad, pasobra Dios ta mesun Dios, awe , ayera y pa semper, tur locual E a haci ayera E por hacie awe tambe, pero no laga nos lubida cu sin Fe ta imposibel agrada Dios.
Mientras cu nos ta warda riba Dios, Dios ta warda riba nos,pa nos realisa e locual ta e berdadero intimidad cu nos mester tin cu Dios, pa asina mira cosnan sosode publicamente, pasobra esey ta locual tabata sosode, y esey ta locual mester sosode tambe caminda poder di Dios lo manifesta publicamente den caya, pasobra Dios su palabra ta fiel y berdadero, y E a bisa cu e senjalnan aki lo sigi esnan cu ta kere.
Ora nos ta busca intimidad cu Dios, tin beneficio grandi pa nos, pero tambe lo tin cambio den nos bida, pa nos por haci e trabao di Dios;
Pordon lo ta presente den nos bida, pasobra intimidad cu Dios ta sinja nos pordona, caminda tin duresa di curason y falta di pordon, intimidad cu Dios ta dificil.
Responsabilidad. Tempo pa Dios, Curason arepenti,Disponibilidad,Oracion, lesamento di Palabra di Dios,y somete na Dios, tur eseynan ta hiba nos na intimidad cu Dios.
Pasobra tur cos ta depende na e cambio den nos curason, y nos mente, y tambe reconoce cu nos curpa ta y ta keda tempel di Dios, y cu e Spirito di Dios ta biba den dje.
Ta dificil biba con cu ta y trata Dios con cu ta, y bisa cu nos tin intimidad cu Dios,intimidad cu Dios no ta un nomber of un stempel e ta un forma di biba.( lifestyle).
Esnan cu ta busca intimidad cu Dios, lo briya manera strea den firmamento, pasobra nan no ta buscando fama pa nan mes, pero nan kier duna tur Honor y Gloria na Dios.
Asina cu humildad ta aumenta, intimidad lo aumenta.
Sinceramente, Pastor Marcel Balootje
