Banco Central di Aruba (BCA) a organisa un seminario di nivel halto riba 31 di maart 2026 cu a trece hunto autoridadnan di supervision di henter Reino Hulandes pa analisa e relacion entre traficacion di hende y e sistema financiero.
Hopi biaha ta trata traficacion di hende for di un perspectiva di husticia penal of politica social. E seminario aki a enfoca riba e dimension financiero: con explotacion relaciona cu traficacion di hende por aparece den fluhonan financiero y con supervisornan y institucionnan financiero por identifica y reacciona miho na e riesgonan aki.
E seminario a wordo atendi tanto personalmente como virtualmente pa profesionalnan di supervision di Banco Central di Aruba (BCA), De Nederlandsche Bank (DNB), Centrale Bank van Curaçao en Sint Maarten (CBCS) y Autoriteit Financiële Markten (AFM). Representantenan di e “Coördinatiecentrum Mensenhandel Mensensmokkel Aruba” (CMMA) y Rabobank Hulanda tambe a participa.
E programa a habri cu un presentacion di CMMA tocante traficacion di hende den e parti Caribense di Reino Hulandes, sigui pa un presentacion di representantenan di e departamento di “Financial Economic Crime Investigations” di Rabobank Hulanda tocante con e patronchinan relaciona cu traficacion di hende por bira visibel den datonan financiero. Despues autoridadnan di supervision a comparti nan experiencia pa loke ta trata indicadornan di riesgo, metodonan di supervision, mecanismonan di cooperacion y areanan caminda por ta necesario pa reforsa mas.
Durante un panel di discusion modera pa CMMA, representantenan di autoridadnan di supervision a papia tocante con riesgonan di traficacion di hende por wordo atende dentro di e cuadro di supervision di integridad existente incluyendo “due diligence” debido di cliente, monitoreo di transaccion y cooperacion cu “financial intelligence units” y entidadnan hudicial.
E conclusion mas importante di e seminario tabata ta cu deteccion efectivo ta depende di reconocemento di patronchinan y rednan enbes di e transaccionnan isola y cu pa atende cu traficacion di hende den e sistema financiero ta rekeri cooperacion estrecho y intercambio di informacion entre autoridadnan relevante den henter Reino Hulandes.
