Federacion di Futbol Arubano (AVB) a anuncia oficialmente e partido final den Division Uno, caminda S.V. RCS y S.V. CDRA lo enfrenta otro pa disputa e titulo di campeon di Aruba den e categoria aki.
E gran encuentro lo tuma luga e diahuebs aki, 28 di mei, pa 8:30 PM na Compleho Deportivo Guillermo Prospero Trinidad (CDGT). Mirando e importancia di e partido final, si na final di e tempo reglamentario e score keda empata, lo hunga dos tempo extra di 15 minuut cada banda. Si despues di esaki ainda no tin un ganador, lo pasa pa tiro fo’i punto penal cu un tanda inicial di 5 pa cada ekipo, y si ta necesario, lo sigui uno pa uno te cu saca e campeon.
Pa e partido aki, cada ekipo tin permiti un maximo di 11 hungador suplente riba banki y, conforme reglamento di AVB, nan por haci un maximo di shete cambio durante e wega.
E fanaticada di ambos ekipo lo wordo ubica na e tribuna parti pariba, y e entrada lo ta via e porta banda di Entertainment Center. E balor di entrada pa adulto ta Afl. 7,00 miertras cu pa mucha bou di 12 aña e ta costa Afl. 3,00. AVB lo tin cashier presente na e luga.
