Tin hopi critica riba declaracion di AVP: falta condena cla y distancia politico
Oranjestad – E declaracion oficial di AVP tocante e sentencia den e caso Avestruz contra Benny Sevinger a genera critica, pa motibo cu segun diferente opinionnan, e partido no a mustra un posicion cla di condena ni tampoco no a tuma distancia di e hecho grave cu a wordo sentencia.
Den nan comunicado, AVP ta bisa cu nan “a tuma nota” di e sentencia y cu nan ta reconoce e independencia di e sistema hudicial. Tambe nan a pidi pa respeta privacidad di famia Sevinger den e momento dificil aki. Pero pa hopi hende, esaki no ta corecto.
E punto principal di critica ta cu, na ningun momento AVP no a bisa claramente cu nan ta condena loke a pasa.
Tampoco nan no a comunica cu nan ta tuma distancia politico y moral di Benny Sevinger.
En bes di esey, e enfasis principal di e comunicado tabata riba privacidad di famia y riba otro procesonan hudicial cu ainda ta pendiente.
Segun e critica, un partido politico cu ta papia di transparencia, integridad y bon gobernacion mester a expresa sin confusion cu un condena di corupcion of actonan serio no ta representa e balornan cu nan partido ta para pe. E argumento ta cu no por simplemente pidi privacidad y sigui dilanti, manera cu nada no a pasa.
Observadornan ta bisa cu AVP tabatin e obligacion politico pa manda un mensahe contundente: cu nan ta rechasa e hecho, cu nan ta condene y cu nan ta tuma distancia di cualkier conducta cu por afecta confianza publico den e partido. Segun nan, un condena asina lo tabata un paso necesario pa mustra liderazgo y coherencia.
Te awor, e declaracion oficial di AVP a wordo mira pa algun hende como un reaccion cu ta evita pa confronta directamente e gravedad di e situacion.
