ORANJESTAD – Segun informacion comparti pa e medio di Noticia Cla, Ministerio Publico (OM) a confirma cu despues di e decision definitivo di Hoge Raad den e caso Avestruz, tin un periodo obligatorio di 9 dia di pausa prome cu e ehecucion di e castigonan di prizon tuma lugar.
Durante e nuebe dianan aki, e condenadonan, Benny Sevinger, Leoncita Arends y Pieter Sussebeek tin e posibilidad legal pa presenta un peticion di gratie na Arthur Dowers. Pe motibo aki Ministerio Publico tin cu pausa e ehecucion cu 9 dia.
Kico ta gratie? Gratie ta pordon di castigo, o sea pa no sinta castigo di prison.
Loke ta hala atencion ta cu pa gran parti di comunidad e proceso aki ta algo nobo y practicamente desconoci. Nunca prome e publico tabata asina consciente cu incluso despues di un sentencia final di e corte mas halto, ainda tin un “porta legal” habri pa intenta na evita, evadi, of modifica un castigo via un peticion di gratie.
Segun fuentenan cerca di e condenadonan, ya tin un intencion cla pa uza e oportunidad aki. Nan lo presenta un peticion formal di gratie na e Minister di Husticia. Esaki tabata wordo papia for di promer cu e sentencia a cay.
E desaroyo aki ta pone un pregunta clave riba mesa: Minister lo tin e ultimo palabra den e caso aki? Y mas importante ainda: E tin e poder pa den practica hala un decision hudicial un banda dor di otorga gratie?
Legalmente gratie ta un instrumento extraordinario cu por reduci, cambia of hasta elimina un castigo, pero su aplicacion ta semper un tema delicado, specialmente den un caso di tanto impacto publico manera Avestruz.
Cu e informacion oficial di Ministerio Publico via Notica Cla, e caso ta drenta un fase completamente nobo. Loke tabata un proceso puramente hudicial, awor ta bira un decision cu tin tambe un dimension politico y administrativo. Pueblo ta siguiendo e situacion cu hopi atencion pa mira con esaki lo desaroya o termina.
Sin duda esaki ta e siguiente capitulo den e novela di corupcion cu a marca Aruba y tur bista awor ta riba e decision cu lo wordo tuma den e dianan venidero. Algun lo interpreta esaki cu nan ta purba sea como sea pa “get away”.
