Día Mundial di concientisacion riba Abuso di Anciano ta ser recorda cada aña dia15 de juni. E día aki a ser reconoci oficialmente pa e Asamblea General di Nacionan Uni den su resolución 66/127, di december 2011, a petición di e Red Internacional pa Prevención di Maltrato di e Adulto Mayor (International Network for the Prevention of Elder Abuse (INPEA), cu a establece pa prome biaha e conmemoración na juni 2006. E día aki ta representa e fecha unda mundo henté ta expresa su oposicion na abuso y sufrimento infligi na esnan di nos generacionan di e adulto mayor. Adultonan mayor ta permanece invisibel y desprotegi, y barreranan structural neglisha. Marconan internacional di derechonan humano existente ta carece di un instrumento legal integral cu ta defini estándardnan normativo pa protección di e adultonan mayor contra abandono, abuso y violencia. Abuso di anciano ta un problema universal y ta prevalece tur caminda y por sosode cualkier luga, pa cualkier persona , pero cu mas frecuencia den seno familiar, institucional y social.
Abuso di Anciano
E abuso di adultonan mayor (incluso esnan cu problemanan cognitivo) por wordu defini como “un acto único of repetidamente, of pa falta di un acción adecua, (negligencia) cu ta tuma luga den cuakier relación cu por spera confiansa y cu ta causa daño of angustia na un adulto mayor”. Esaki ta un problema social global cu ta afecta salud y e derechonan humano di myones de adultonan mayor den mundo henter y un problema cu merece atención di comunidad internacional, incluso Aruba.
Na hopi parti di mundo e abuso di anciano ta tuma luga cu poco reconocimento y como sifuera ta algo normal of un norma acepta. No ta hopi tempo cu e problema social grave aki tabata skondi pa bista di publico y considera principalmente un asunto privá. Incluso awendia abuso di anciano ta sigi ta un tabú, mayoría biaha subestima y ignorá pa comunidadnan den mundo henter. Sin embargo, tin evidencia substantial cu ta indica cu e abuso di anciano ta un problema importante tanto social y di salud público.
Abuso di anciano ta un problema cu ta existi tanto den paísnan den desaroyo como den esnan desaroya, pero por lo general no ta wordo denuncia na nivel mundial.
E tasa of estimacionan di prevalencia ta existi solamente den paísnan desaroya unda ta papia di un prevalencia di 1% te 10%. Aunque e maltrato/ abuso di anciano ta desconoci su importancia social y moral ta evidente tambe na Aruba. Como tal, mester exihi un reacion global riba tur nivel y cu ta enfoka, riba protección di derechonan y seguridad di e adulto mayor ( incluso tur pensionado).
Na Aruba tin casi nada di infrastructura cu ta promove inclusión y seguridad di e población anciano.Ta existi diferente documento prometedor, pero den práctica, Aruba ainda ta carece di política efectivo pa preveni abuso y pobreza di anciano riba tur nivel. Esaki tambe ta ensera derechonan di nos grandinan pa ser trata cu respet y dignidad. Ohala un día Aruba por gosa di un ley di protección di nos grandinan.
Desde un perspectiva social y di salud, y den nomber di e proyectonan:“Comunidad Amigable y Sigur pa nos grandinan” y proyecto “BISA NO NA ABUSO DI ANCIANO (desde 2011) Fundación Alzheimer Aruba (FAA), kier enfatisa cu maske e atención primaria di salud di atención médico como esun den sectornan y servicionan social ta bon equipa pa identifica y trata e problema di maltrato di adultonan mayor; e abusonan aki ta continúa siendo subdiagnostica y neglisha, especialmente a través di e asina jama “generation gap”. E sensibilización y prevención di maltrato/abuso di anciano ta rekeri participación di henter comunidad. Abuso y maltrato di adultonan mayor solamente por wordo evita cu éxito, si nos desaroya un cultura global (tambe comunitario) cu ta fomenta solidaridad intergeneracional.
