Kico ta Jornada Mundial di Hubentud?
World Youth Day (WYD) of Jornada Mundial de la Juventud (JMJ) of Jornada Mundial di Hubentud (JMH) ta un encuentro di hobennan, cu ta bini hunto for di tur parti mundo, pa topa cu Papa.
E ta tambe un peregrinacion, un celebracion hubenil, un expresion di Iglesia universal y un momento intenso di evangelisacion pa nos hubentud.
Apesar cu esaki tin un identidad Catolico, ta hopi evidente cu WYD ta habri su portanan pa tur hoben sin importa con cerca of aleha e ta di Iglesia.
E ta ser celebra na nivel Diocesano, cuminsando for di diadomingo di rama y despues di cada dos, tres of cuater aña, Papa ta scoge un ciudad pa hospeda e encuentro internacional y caminda cu Papa mes lo ta presente pa ta hunto cu e hubentud.
E encuentro aki ta trece miyones di hoben hunto pa celebra nan fe y sentido di ta pertenece na Iglesia.
For di e prome encuentro na Roma na aña 1986, WYD a proba di ta un laboratorio di fe, un luga caminda vocacion pa matrimonio y bida consagra ta nace. Tambe e ta un instrumento pa evangelisacion y transformacion di Iglesia.
E enfoke ta pa promove na tur participante un experiencia di un Iglesia universal, tambe pa stimula y anima cada un pa un encuentro personal cu Cristo Hesus.
E ta un estimulo nobo di fe, speransa y caridad di henter e comunidad di e ciudad cu ta anfitrion di e encuentro aki.
Cu e hobennan como e protagonistanan, WYD ta busca pa promove paz, unidad y fraternidad memey di persona- y nacionnan rond mundo.
E ultimo WYD tabata na Panama na 2019, caminda obispo y varios pastoor a compaña e hobennan di e seis islanan Hulandes. E siguiente WYD ta bay ta na 2023 na Lisboa, Portugal!
Ban coopera cu e hobennan di Aruba
E hobennan cu ta bay representa Aruba na WYD na 2023 na Portugal, ta den nan ultimo siman pa recauda fondo pa nan prome actividad, cu ta e Bingo cu Bingo Aruba cu ta bay tuma luga diasabra 3 di september via canal 48 Diario TV pa 7:00 pm. Cada carchi (buki) ta costa Awg.10,00 y tur loke recauda, lo wordo uza pa e gastonan di e hobennan so.
Durante e weekend di 27 y 28 di augustus lo tin hoben- y miembronan di Pastoral Hubenil Aruba (PHA) riba tereno di e diferente parokianan, bo por acerca nan pa duna bo cooperacion.
Por bay na e outletnan: Shiribana Bingo Center, Queen Euro Bingo Center y Pineapple Express Aruba. Tambe por tuma contacto cu PHA via cel 593-6066, 662-9659 of WhatsApp 565-7176.
Di antemano PHA ta gradici bo pa bo cooperacion generoso!
