Scirbi pa Pastor Marcel Balootje.
Tempo mi tabata mucha, mi tabata papia manera mucha, pensa manera mucha,rasona manera mucha, ma awor cu mi a bira homber, mi a pone tur cos di mucha un banda.( 1Corintionan 13: 11).
Manera e mundo ta avansa cada dia den technologia, ciencia , inmoralidad y perversidad, ta tempo pa nos Fe crece tur dia mas den Señor, pasobra locual ta vence mundo ta nos Fe.
Sin Fe ta imposibel agrada Dios, y nos Fe ta wordo purba tur dia, pasobra pa medio di Fe nos lo alcansa tur locual nos mester den Cristo Hesus.
Nos mester tin confiansa den Dios, pa asina nos por crece spiritualmente, nos mester tin Fe den Dios pa basha e flechanan di e enemigo abao, nos mester tin Fe den Dios pa rechasa maldad den tur sentido.
Nos Fe no por ta temporal, nos no ta campa den Señor, nos ta biba pa Señor , den Señor nos no tin temporada, pasobra nos tur tin cu perservera pasobra ta para scirbi: Door di boso perseverancia boso lo gana boso alma.( Lucas 21:19).
Tur dia nos mester alimenta nos Fe cu oracion y lesando e palabra di Dios, cual ta nos base Spiritual, caminda Dios ta papia cu nos y guia nos , pa asina nos por wordo libra di e enemigo.Nos mester bishita cas di Dios ( Iglesia) caminda nos mester haña e cuminda spiritual pa nos bida, pasobra Dios ta bisa pa nos no keda sin congrega.
Notando e velocidad cu maldad ta avansa, con maldad ta wordo aproba, con hende ta tuma malo haci bon, con muchanan mundialmente ta wordo instrui den locual ta perversidad,pa asina nan wordo domina cu scuridad.
Como mayor nos mester demostra Fe , pa asina nos yuinan tin un base for di cas, con nan por para firme,contra bagamunderia y maldad pasobra nos mester siña nos yuinan con ta resisti maldad for di chikito , y nos tur sa cu maldad ta wordo resisti pa medio di Fe den Señor Cristo Hesus.
Haci tur locual ta posibel pa rondona nos mes cu hende di Fe,manera Hesus a haci na e cas di Jairo,pa asina e milager por a tuma lugar.( Marco 5:39-43).
Si mundo di scuridad ta kere asina tanto den locual nan kier haci, cu nan por cambia hasta e creacion di Dios, awel nos mester lanta riba y cuminsa proclama Fe den pueblo pa medio di e Evangelio di e reino di Dios.
Ta dificil pa esnan cu ta sirbi Dios por ta comfortabel mirando den e direccion cu cos ta bayendo.
Nos tur sa cu señalnan ta demostra cu e binida di Cristo Hesus ta serca, pesey mes nos no por drumi, nos mester alerta e mundo henter, di su binida.
Den Mateo 25:1-15 nos tur mester mira con prepara nos mester ta pa e binida di Cristo, y pa nos por haci esey nos mester di Fe.
Den Lucas 21:34-36 ta para scirbi: Tene cuidao pa boso curason no ta carga pa causa di paranda y buracheria y e preocupacionan di bida y e dia ey bin diripiente riba boso caminda manera un trampa.
Pasobra e lo bin riba tur esnan cu ta biba riba superficie di henter mundo.
Ma sea alerta tur ora bay, haciendo oracion pa boso por tin forsa, pa scapa di tur e cosnan aki cu ta bay tuma lugar y para dilanti di e Yiu di hende.
Ma boso rumannan stima edifica boso mes den boso santisimo Fe , haciendo oracion den Spirito Santo.(Judas 1: 20).
Awor mas cu nunca nos Fe ta sumamente importante, pa nos bida, cas y famia.
Sinceramente,Pastor Marcel Balootje.
