DEPORTES – Diadomingo mainta, campeonato di La Liga Santander a continua unda cu prome wega di diadomingo tabata entre FC Barcelona y Getafe.

Barcelona ta bin di un empate contra di Athletic Club Bilbao cu score di 1-1 mientras cu Getafe ta bin di un derota contra di Sevilla cu score di 1-0 y no tin wega gana den campeonato aki ainda.

Barcelona ainda no ta mustra e ekipo cu tabata trece defensa nan den panico y awor sin su hungador estrella, ta mustra cu ekipo falta hopi.

Aunque no ta ekipo cu ta acostumbra cu ne, apenas 2 minuut di wega, Barcelona ta bay ariba cu score di 1-0 cu gol anota pa Sergi Roberto y cu asistencia di Jordy Alba.

Ekipo di Getafe na di 18 minuut ta bay den contra atake y despues di algun bon combinacion entre Carles Alena y Sandro Ramirez caminda cu Sandro Ramirez ta empata e wega 1-1.

Despues di e gol aki, Barcelona a cuminsa toca e bala poco mas den medio campo y trata na tene esaki y na di 30 minuut a bay den contra atake caminda Frenkie de Jong ta haci un pase perfecto pa Memphis Depay cu ta drenta area penal, ta laga hungadornan di Getafe pasa bay y los un tiro fuerte pa duna Barcelona ventaha cu score di 2-1 cu un bunita gol.

Asina tambe e prome mitar a termina cu score di 2-1 na fabor di FC Barcelona.

Di dos mitar, ekipo di Getafe a pone hopi presion riba defensa di Barcelona caminda keeper di Barcelona, Marc Andre Ter Stegen na algun ocasion a luci riba tironan di Getafe.

Getafe a busca manera pa empata e wega, pero no a logra y asina tambe e wega a termina cu score di 2-1 na fabor di FC Barcelona cu ta yega 7 punto den campeonato di La Liga Santander 2021/2022.

LEAVE A REPLY

Please enter your comment!
Please enter your name here