DEPORTES – Campeonato di La Liga Santander di Spaña a inicia, FC Barcelona a mira accion diadomingo atardi ora cu
nan a enfrenta ekipo di Real Sociedad.
FC Barcelona sin duda alguno tin cu acepta cu su astro hungador Lionel Messi ya no ta formando parti di
ekipo y tin cu cuminsa traha riba otro hungadornan y pensa cu ekipo no ta draai solamente a base di un
hungador.


Prome cu wega, a ser anuncia cu Gerard Pique a acepta un reduccion substancial di su salario pa asina
por a inscribi algun hungador manera Memphis Depay y Eric Garcia.
Wega aki a inicia y den prome minuutnan FC Barcelona tabata busca manera di combina cu otro riba
tereno y mientras cu wega tabata avanza por a tuma nota cu ekipo a cuminsa domina e wega.
Na di 19 minuut Barcelona ta haya un tiro liber y aki Memphis Depay ta pone un cruse perfecto caminda
cu Gerard Pique ta drenta den defensa y cu cabez ta anota prome gol di wega pa asina duna Barcelona
ventaha cu score di 1-0.


Barcelona a keda toca e bala mas tanto den medio campo cu a haci cu dificilmente Real Sociedad por a
yega na e bala.
Den minuutnan extra di prome mitar Frenkie de Jong ta bay den contra atake y aki tambe ta crusa e bala
dilanti gol caminda cu Martin Braithwaite ta cabeza fuerte pa haci e wega 2-0 na fabor di FC Barcelona.
Asina tambe prome mitar a bay den descanso cu score di 2-0 na fabor di FC Barcelona.
Den di dos mitar, Barcelona tabata tin mas dominio cu Real Sociedad y tabata na di 56 minuut unda cu
Jordy Alba ta bay den contra atake y ta crusa e bala dilanti gol caminda na prome instante keeper di Real
Sociedad ta logra desvia, pero ta cay riba pia di Martin Braithwaite y cu un tiro fuerte ta haci e wega 3-0.
Despues di e gol aki, Barcelona a bay hunga un wega mucho relaja y aki ta unda cu Real Sociedad a
probecha na di 82 minuut caminda Ander Barrenetxea ta crusa e bala pa Julen Lobete cu ta anota e
prome gol pa Real Sociedad corta ventaha di 3-1.


Dos minuut despues, un hugada cu ta resulta polemic caminda defensa di Barcelona Nico Gonzalez ta
slide y rechaza e bala limpi, y den proceso hungador di Real Sociedad ta den caminda y ta dal contra
otro, pero referee ta mira cu tabata tin foul y ta duna Nico Gonzalez, Mikel Oyarzabal ta tuma e tiro liber
aki y ta anota un tremendo gol pa Real Sociedad haci e wega interesante, ventaha cu tabata parce dificil
pa yega pero e wega a bira 3-2.


Despues di e gol aki, Barcelona a sacudi y a cuminsa hunga e wega manera di costumber, di tene e bala
den nan poder, toca den medio campo y ataka riba linea, y den un di e atakenan ey den minuutnan
extra, Martin Braithwaite ta bay riba linea y crusa e bala pa Sergi Roberto kende ta anota e di cuater gol
pa sentencia e wega pa FC Barcelona.
Asina tambe e wega aki a termina caminda FC Barcelona ta logra su prome victoria den La Liga
Santander 2021.

LEAVE A REPLY

Please enter your comment!
Please enter your name here