Tension den e coalicion di gobernacion a yega un punto di di mas halto. Lider di partido Futuro, Gerlien Croes, a manda un mensahe hopi cla y directo pa e partido aliado AVP y specialmente pa e candidato pa minister, Mike de Meza: of boso ta cumpli cu e acuerdo di gobernacion, of e gobierno aki ta cas.
E crisis aki a wordo desencadena despues di e recien declaracionnan di Gerlien Croes, unda e a remarca cu si Mike de Meza kier drenta gabinete como minister, e mester acepta e introduccion di rijkswet HOFA. E punto aki no ta simpelmente un preferencia, sino un di e pilarnan cu Futuro a stipula y acorda cu AVP pa por a forma e coalicion actual.
“Un acuerdo ta un acuerdo”
Segun Croes, no por existi un situacion unda un minister den e mesun gabinete ta carga un opinion o posicion contrario na e liña oficial di e acuerdo di gobernacion. E lider di Futuro a mustra cu un gabinete mester goberna cu un solo vos y cu unidad.
“Si Mike de De Meza no ta pro HOFA, esaki ta nifica automaticamente un kiebro di e acuerdo di gobernacion. Y cu un acuerdo kibra, simplemente no tin gobierno,” e mensahe politico a resona di forma contundente.
Futuro di e Coalicion den Duda
E posicion firme di Gerlien Croes a pone e liderato di AVP den un huki hopi dificil. Di un banda, Mike de Meza ta un di e figuranan veterano di AVP cu semper a expresa criticanan severo o duda riba rijkswet HOFA. Di otro banda, e matemagica di e mayoria den Parlamento ta depende completamente riba e alianza aki cu Futuro.
Den e gang politico na Bestuurskantoor ta wordo resona cu e tambaleo aki ta mustra e fragilidad di e coalicion nobo. Si AVP no logra habri e mesun pagina cu Mike de Meza, of si De Meza dicidi di no cede na e condicion di HOFA, Aruba por ta na porta di un crisis politico cu por hiba na e caida di e gobierno aki.
Pueblo di Aruba ta keda masha preocupa pa mira si pragmatismo politico lo prevalece, o si e diferencianan aki lo kibra e coalicion.
