Varios ciudadano a acerca nos redaccion pa expresa nan molester y desacuerdo pa e manera cu e asunto di privacidad ta wordo trata serca algun dokter di cas y den nan sala di espera.
Un di e kehonan mas grandi cu ta resona cerca e publico ta e falta di discrecion ora un paciente yega pa atende su cita. Pa hopi hende, ora bo ta sinti bo mes malo o bo ta bayendo un dokter di cas, e motibo di bo bishita mester keda puramente entre abo y e profesional di salud. Sinembargo, e realidad den varios practica di dokter na Aruba ta totalmente diferente.
“Kiko bo tin?” dilanti tur hende
“Mester bay bek na e respet pa e paciente. Ora bo yega cerca e asistent o e secretaria, e ta puntra bo den vos halto dilanti tur e demas pacientenan sinta den sala di espera kiko bo tin. Dicon mi mester canta mi sintomanan o kehonan di salud dilanti un sala yen di hende cu mi ni conoce?” un ciudadano indigna a expresa.
E situacion aki ta haci cu hopi paciente ta sinti nan mes incomodo, bergonsa, y viola den nan derecho di privacidad. Loke un persona ta padece di dje, sea ta algo simpel o un condicion mas delicado, ta informacion personal y secreto.
Mester di cambio inmediato
Comunidad ta haci un yamada cla na e Dokternan di Cas y na e Asistentnan pa pone mas atencion na e aspecto aki. Privacidad no ta un luho, e ta un derecho di tur paciente.
Maneho mas discreto: Mester busca otro manera pa haci e intake, sea via papel, na un balcon sera, o unda e otro personas nan den sala di espera no por scucha.
Respet pa e pacient: Ora un hende ta malo, e ta vulnerable caba. Agrega e malestar di mester expone su salud dilanti tur hende no ta algo bon ni profesional.
E mensahe di e pueblo ta keto bai cla: Salud y sintomanan di un hende mester keda priva y e mal custumber aki mester stop!
